(Oranjestad) – Pa medio di e comunicado aki N.V. ELMAR ta informa nos comunidad di varios interupcion di suminstro di coriente cu a tuma lugar den diferente area for di weekend te cu diamars, 7 di september 2021:
Diasabra, 4 di september 2021, pa mas o menos 2.30 di atardi, nos a haya e aviso cu WEB N.V. a haya nan mes confronta cu un problema den nan suministracion di coriente. Pa e motibo aki WEB N.V. a schakel uit e substation principal di ELMAR na Balashi. Consecuentemente suministro di coriente a keda interumpi den areanan di Balashi, Savaneta y vecindario, Pos Chikito, Sabana Basora, Barcadera, Parkietenbos, Buena Vista, Simeon Antonio, Santa Cruz y vecindario, Cumana, Paradera, Casibari y Piedra Plat.
Mesora nos tecniconan a mobilisa wardando asina ariba e señal di WEB N.V. pa por reestablece suministro di coriente. Pa 3.46 di atardi, coriente a wordo suminstra bek na tur areanan afecta.
Diadomingo, 5 di september 2021, pa mas o menos 9.52 di anochi, nos a haya un melding cu e sistema di protecion ariba e switch den nos onderstation na Sabana Blanco a habri. Un gran parti di Oranjestad den vecidario Camacuri y Klip manera Beatrixstraat, Adriaan Lacle Boulevard, Columbusstraat, Maria Chistinastraat a keda afecta. Mesora nos tecniconan a mobilisa pa bai resolve e problema cu a origina den e trafohuis situa den cura di Garage Cordia.
Pa motibo cu e cura di Garage Cordia tawata sera na yabi a dura bastante rato pa nos tecniconan por a drenta y resolve e problema na e sitio indica.
Pa 11.11 di anochi, coriente a wordo suminstra bek na tur areanan afecta.
Dialuna, 6 di september 2021, pa mas o menos 7.30 di anochi, nos a ricibi un melding di un interupcion den suministro di coriente den e area di Santa Cruz.
Nos tecniconan a atende mesora cu e problema aki cu tawata den e trafostation dilanti di 88 Food Center na Macuarima. E problema ta un switch di alto tension y esaki a worde resolvi. Pa 9.23 di anochi, coriente a reestablece suminstro di coriente na tur areanan afecta.
Diamars, 7 di september 2021, pa mas o menos 1.53 di atardi nos a haya un melding cu un schoordraad sosteniendo un palo di luz na Meiveld lo a kibra. Como cu tin un hoogspaningstrafo ariba e palo di luz aki y door di peso esaki a pone cu e palo di luz a kibra y cay ariba caminda. Mesora tecniconan a mobilisa pa haci trabaonan di reparacion necesario. Areanan di Pavia, Rooi Afo, Meiveld, Paradera y vecindario a keda afecta. Algun di e areanan afecta a worde suminstra cu coriente bek mientras un parti chikito mas den cercania di unda e trabaonan di reparacion ta tumando lugar, ta sin coriente. Trabaoanan ta continuando pa por restablece coriente bek mas lihe cu ta posibel.
N.V. ELMAR ta keda enfatisa na su clientenan cu suministro di coriente sin interupcion ta un meta esencial den e maneho diario di N.V. ELMAR. Por medio di e comunicado aki N.V. ELMAR ta pidi su disculpa na su consumidornan pa e inconveniencia cu e interupcionnan ariba menciona por a ocasiona.