Home » Nos Kier Boneiru Bek I Bonaire Human Rights Organization(BHRO) a bishita nos isla hermana Aruba

Nos Kier Boneiru Bek I Bonaire Human Rights Organization(BHRO) a bishita nos isla hermana Aruba

by Admin
0 comment 113 views

Un delegashon di Bonaire konsistiendo di Fundashon Nos Kier Boneiru Bek(NKBB) I Bonaire Human Rights Organization(BHRO) a bishita nos isla hermana Aruba resientemente I a kondusi presentashonan na lidernan governamental I parlamentu di Aruba pa obtene apoyo pa e trajektoria di e pueblo Boneriano pa re-establese Bonaire riba e lista di teritorionan-sin-propio-gobernashon di Nashonan Uni.

 

Diamars 16 di november NKBB a presenta un resumen di e investigashon hasi pa e Dependency Studies Project, ku Analista Prinsipal Dr Corbin, na e miembronan di parlamentu di Aruba. E “assessment” ku ta independiente I rekonose pa Nashonan Uni, a midi e nivelnan di propio-gobernashon di Bonaire di akuerdo ku standardan Internashonal I Nashonan Uni. E la estabese ku esaki ta kai way bou di e minimo kriterianan.  Ademas nos a re-enfatisa I kondena ku Hulanda ku ta parti di Nashonan Uni I Union Oropeo ta kontinua ta viola tratadonan di Derecho Humano I Charter di Nashonan Uni.

 

E presentashon ku a dura un ora largu ku despues un ora mas ku preguntanan I deskushonan ku miembronan presente di ambos koalishon I opposishon, kualnan a rekonose e gravedad di e situashon politiko entre Hulanda I Bonaire, islanan BES, I a duna nan sosten I solidaridat pa e meta di NKBB I e pueblo Boneriano. Mas alew a diskuti e hecho ku nos gobierno lokal I opposishon ta subordina na Gobierno Hulandes na Den Haag, hasiendo nos suidadonan di segundo klase, ankra den Konstitushon Hulandes sin derecho igual I kontra di deseo di e pueblo Boneriano.

 

Durante e diskushonan un miembro di parlamentu a remarka ku asta Aruba, Korsou I St Maarten ta den un relashon komprometedor ku Hulanda. E gobernador, ku ta representa e interesnan di Rei Hulandes I Gobierno Huandes, tin e poder pa veto desishonan tuma pa e parlamentonan di e islanan, ku ta representa e deseo di e pueblonan di e islanan. E tipo di relashon kolonial aki ta algu ku nos mester a desaroya laga atras I no por eksisti den siglo 21. 

 

Nos ta kontinua ta elabora ku e lista di Nashonan Uni di Teritorionan-Sin-Propio-Gobernashon den nos bista ta e uniko solushon fundamental I struktural pa salba I proteha e pueblo Boneriano, ku systematikamente a wordu desplaza I redusi den menos ku un dekada te ku bao di 40% di totalidat di e populashon, hasiendo nan un grupo di minoria riba nan mes isla I ta enfrentando eradikashon di nan kultura, identidat I eksisitensia komo pueblo Boneriano. 

 

BHRO I NKBB ta kontinua ku su trajektoria pa pone Bonaire riba lista di protekshon di NU komo teritorio-sin-propio-gobernashon, I ta re-inforsa e lucha kontra opreshon I deskriminashon ku ta afektando nos pueblo, I tin e speranza ku nos por krea un frente uni ku nos islanan ruman.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio