Despues cu OE AZV a tene su conferencia di prensa na januari ultimo tocante e cambionan principal cu e aseguradonan por spera den 2022, OE AZV a tuma nota di e pregunta di algun ciudadano …”pakico no ta elimina AZV?”
Director Edwin Jacobs di OE AZV ta compronde e pakico di e pregunta aki y a tuma nota cu esaki ta un pregunta cu ta sali for di e aseguradonan hoben. E asegurado cu ta disfruta di salud y vitalidad pero cu ta paga e AZV premie tur luna y no ta uza esaki. Na e hobennan aki, director di OE AZV ta pidi nan pa tira un bista alrededor. Wak bo famia, wak bo welo of wela, wak bo tanta of omo. E realidad di bida ta cu na momento cu bo nace tin gastonan medico haci relaciona cu e parto y cuido, despues cu bo tres of cuater aña e gastonan ta baha pa mas despues ora bo yega edad di entre 65 pa 70 aña e gastonan ta cuminsa subi of ta haya un piek. Esey ta e caso di hende homber. Pa e hende muhe ta conta cu e gastonan ta cuminsa aumenta despues di edad di 18 of 20 aña. E hende muhe ta cuminsa haya yiu y gastonan ta cuminsa aumenta.
Seguro
Un seguro ta basa riba e pensamento cu un grupo di hende ta paga pa e gastonan cu e ta uza. Por ehempel si ta un grupo di hende jong, vitaal, nan gastonan lo ta abou, e prima ta abou. Na momento cu bo tin un grupo di hende cu nan gastonan medico ta aumenta, por ehempel pa motibo di nan edad halto y nan tin un of mas malesa, nan ta bay haci mas uzo di servicio medico y bo ta parti e gastonan riba tur esnan cu mester paga e prima.
Seguro Priva
Den un seguro priva bo ta ripara cu nan ta pone hopi condicion. Si bo ta diabetico, nan ta pone un prima mas halto, si bo tin un condicion di curason, bo ta haya un prima mas halto y tambe na cierto edad halto, bo prima ta subi anualmente. Y si bo ta comparti e gastonan di seguro, por ehempel manera na Hulanda unda ta comparti tur e gastonan, bo lo ripara cu tur aña e prima ta subi cu 10 of 15 euro. E motibo? Enbehecimiento di e poblacion na Hulanda, mas hopi hende ta haci uzo di servicio medico, mas e gastonan ta subi. Adicionalmente mester tene cuenta cu e seguro ta pone su ganashi riba dje. E seguro ta un negoshi, e tin cu pone banda di su gastonan un porcentahe di ganashi.
Kita AZV
Den caso di un sistema di un seguro social, no solamente ta coy e gastonan y reparti esaki bou di e aseguradonan, pero tin e BAZV tambe pa yuda cubri gasto. Si nos pensa cu door di privatisa seguro AZV e gastonan medico ta bay baha nos ta ekiboca paso e hende ta keda tin mester di e servicio medico. Dus kico ta bay pasa si bo privatisa? Bo ta bay pasa e seguro AZV pa sector priva cu ariba dje ainda ta bin cu e condicionnan anteriormente menciona (exigencia cu ora bo tin un condicion existente bo ta paga mas prima paso bo ta un riesgo mas halto pa nan) y ganashi! Pues nos pensamento ta cu si bo bay privatisa AZV …na final di dia comunidad den su totalidad ta bay paga mas.
Solidaridad y pago
Si bo ta pensa bo ta hoben y vital, awor aki abo ta bay paga menos…despues lo yega e dia ora bo tambe ta bay paga mas. Nos sistema AZV ta basa riba solidaridad, entre esnan cu ta hoben, vitaal y cu tin bon salud ta paga mas cu nan ta gasta y loke ta wordo paga dimas ta wordo uza cerca otronan cu ta paga y nan gastonan ta mas halto. Por ehempel e pensionado di AOV cu ta biba na Aruba y ta cobra AOV so, ta 80%. SVB ta paga un promedio di 53 florin na prima di AZV pa nan pa luna, pero keremi cu un pensionado ta uza mas cu e suma ey den un luna. Ta nifica cu esnan jong ta yuda contribui pa esnan mas grandi. Cu e conviccion si cu mañan nan tambe ta yega na edad mas halto y nan consumo (medico) ta bira mas halto anto e ora e otronan jong ta bira paga pa nan . Esey ta e sistema di solidaridad cu nos no mester perde for di bista.
Tene cuenta!
Bo por ta jong, hoben y vitaal, bo ta bira haya un accident cu gastonan enormemente grandi. Por ehempel bo mester bay cu air ambulance Colombia. 23 mil florin na air ambulance so…sin conta e gastonan acerca pa tratamento of cuido. Pues, ora bo ta jong y vitaal, kisas malesa no ta dal bo, pero por sosode un accident unda bo mester urgentemente di un seguro manera AZV. Mi ta convenci cu un seguro priva no ta e solucion pa nos gastonan medico, simplemente mester duna un poco mas di nos, nos mester controla e crecemento di e gastonan y traha mas eficiente den e sector.