ORANJESTAD – Awe mainta Hues di Corte di Husticia a condena e ex agente di Polis, S., na 4 aña di prison di cual 4 luna ta condicional. Hues ta haya S. culpable cu entre Januari 2017 y Augustus 2021, a viola su pareha 3 biaha, a menaza pareha di su mama y a maltrata su mama.
ARUBA NATIVE por a compronde cu e sentencia tabata via video conference caminda e acusado S. tabata na KIA, mientras cu Hues, Fiscal y abogado tabata den sala di Corte di Husticia.
Tratamento di e caso a tuma lugar 11 Februari 2022 caminda a sali na cla cu S. a wordo retira di Polis door cu e tin hopi problema di abuso di alcohol. Mando di Polis a duna S. chens pa e rehabilita pero e no a busca ayudo. Ta asina cu S. no ta di acuerdo cu el a wordo retira y a apela contra e decision di retiro di Polis.
Hues awe mainta a bisa cu e ta haya legalmente proba cu S. a viola diferente biaha su mesun pareha, a menaza e pareha di su mama y a maltrata su mesun mama. Hues ta haya e castigo exigi pa Fiscal na su lugar. El a condena S. na 4 aña di prison di cual 4 luna ta condicional cu un tempo di prueba di 3 aña. Durante e tempo di prueba, S. mester ta bou guia di Reclasering. Durante e periodo aki e lo por haya ayudo pa su problema di adiccion y tambe ayudo psycologico.