Home » Historia di Aruba: E heroe di Piedra Plat

Historia di Aruba: E heroe di Piedra Plat

by Admin
0 comment 607 views

E biaha aki nos lo dedica nos Historia di Aruba, na un persona cu a wordo yama heroe despues di a salba bida di un mama di tres yiu, un señora di 25 aña.

Prome cu awa di W.E.B. na Aruba ta awa di pos nan tabata usa, e posnan aki di awa dushi tabata tin hopi rond di nos isla. Den tur bario tabata tin pos caminda e habitantenan tabata bay saca awa pa nan usa.

Na varios pos rond di Aruba a yega di sosode accidentenan of hendenan cu a comete suicidio. Na Rooi Afo, december 1954, un dama hoben (22) a cay den un pos y a hoga. Na 1956 tabata tin un mama cu a benta su curpa y di su baby den pos tambe na Rooi Afo. Hopi aña despues na 1978, na Calabas un homber a benta su curpa den pos.

E posnan rond di Aruba tin hopi historia di sucedidonan di e temponan aya. E posnan tabata luga unda e habitantenan tabata topa otro ora di bay busca awa, e bieunan tabata conta cu eynan nan tabata topa y combersa un rato.

Piedra Plat tambe tabata tin su posnan, e sucedido na e pos di Piedra plat cu tabata keda poco pabou di e Santana Protestant, mas e menos den e bocht pa bay Indian Rock Garden.

E señora nos lo yam’e Catharina, su nomber no ta conoci pa nos.

Piedra Plat:
Tabata diaranson 2 di januari 1963, di dos dia di aña, den careda ya di atardi ya birando un poco scur kiko tabata e motibo nos no sa, pero Catharina e dicidi di bay na e pos den e hanchi pabou di e santana Protestant na Piedra Plat, kiko tabata su motibo nos no por bisa, segun nos por a compronde cu e la cay den e pos, pero tin otro hende cu a conta cu Catharina lo kier a pone fin na su bida.  Pero esey nos no por confirma.

Na dado momento un persona a bati alarma na polis bisando cu tin un señora benta den e pos. E yamada lo a drenta te den careda di 9’or y mey di anochi.  Mesora polis a trata na bay na e sitio pero e caminda tabata hopi malo y nan a pidi opperbrandmeester di e tempo ey Vermeer pa nan bay hunto na e sitio. E truck di brandweer di Santa Cruz tambe a bay, pero no tabata facil pa yega eynan, e hanchi tabata hopi small.

Brandweer e tempo ey tabata tin un pickup moderno (1963) y full equipa cu tur herment di rescate, nan tabata tin varios cabuya, lusnan hopi bright y salbabida. E pickup di brandweer tabata mucho mas adecua cu e autonan cu polisnan tabata uza.

Despues di poco maniobra den e hanchi small, por fin nan a logra yega na e pos. Despues cu brandweer a cende su lusnan cla, enberdad nan tabata por a mira den profundidad un persona drumi den fondo di e pos, por a mira su schouder y cabes net riba awa, pero no por a confirma si e tabata bibo ainda.

Den e siguiente secondenan a reina un silencio, ni e polisnan na e sitio y ni brandweer no kier a  baha den e pos. E boca di e pos tabata hopi small y e tabata mustra hopi peligroso. E pos tabata tin un profundidad di 15 meter y e dama tabata te den fondo di e pos. Diripente un polis a dirigi su mes na e mironesnan y a cuminsa puntranan, si un di nan kier pone nan mes disponibel como boluntario pa baha den e pos.

For di e cantidad di mironesnan para rond di e pos,  un hoben di bon curason, a bin dilanti, e hoben tabata Genaro Werleman (25). Genaro ta un hoben cu ta biba na Hooiberg no mucho leu di e pos. E tabata flaco y por a pasa facilmente door di e boca small di e pos. Pa su persona e tabata hopi importante pa salba e dama, pasobra tabata trata di e compañero di bida di un di su ruman ruman homber nan y alabes e señora ta mama di tres yiu.

Genaro no a perde mas tempo, mesora a bin dilanti y nan a cuminsa mara e cabuya, e la bisti e salbabida rond di su cintura. E brandweernan presente a dun’e un cabuya y un salbabida mas, esey tabata pa e victima.

Na comienso e situacion tabata hopi tenso mirando con smal e boca di e pos tabata y mas aun tabata trata di bida di un ser humano, riba dje nan no tabata si e señora den fondo di e pos ainda ta na bida.

Brandweer cu ayudo di algun mirones poco poco a cuminsa slek e cabuya y Genaro a cuminsa baha den e pos, aunque cu un poco mas abou, e pos a bira un poco mas hancho, pero asina mes e tabata algo hopi riscante.

Genaro hopi nervioso, cada biaha tabata mira abou, e tabata mira e cabes y e schouder di e señora net riba awa. Na mita caminda  den e pos ainda Genaro no por a mira si e señora ta bibo ainda. Genaro tabata tin e salbabida y e cabuya pa e victima bon wanta esey tabata pa su persona e cos mas principal cu e mester yega full abou cu ne. Den su ansha e tabata pensa, Si e yega te na e victima, e parti mas dificil a pasa.

Genaro despues di un rato enberdad a logra yega te na e fondo y na momento cu e la nota cu e señora ta bibo y ainda tabata halando rosea. Mesora e la dal un grito masha duro mes, pa tur cu tabata ariba por a scucha ” E ta bibo, e ta halando rosea”. Esaki tabata e grito cu e miho noticia cu tur hende na e pos na Piedra Plat, tabata ansha pa scucha.  Un emocion grandi a reina entre esnan cu tabata para na e pos y por a mira e caranan contento, especialmente di e famia y bisiñananan cu tabata presente.

E hombernan cu mester hala e cabuya bek si nan cara tabata mas serio, mirando cu awor nan mester hala e cabuya no cu un curpa mara na dje, pero cu un persona bibo y riba dje herida. Esaki sigur lo mester bay sosode cu hopi cuidou pa e señora no dal contra e muraya di e pos.

Un rato despues cu Genaro a logra pasa e salbabida rond di e cintura e señora y a mara e cabuya, e trabou a cuminsa di hisa nan ariba. Genaro tabata mara na un cabuya y e señora na e otro. Poco poco esnan ariba na e pos a cuminsa hala e cabuya, asina nan a cuminsa poco poco bay ariba. Cada un ta mara na un cabuya pero cada un na un cabuya separa. Tur dos pareu y hopi poco poco a cuminsa hisanan. Na momento cu nan ta biniendo ariba, Genaro mester a keda cerca di e victima pa evita cu e lo dal su curpa contra e piedranan di e muraya di e pos.

E tabata un momento di hopi tension, pero Genaro a keda trankil y tabata full concentra pa nada bay fout. Masha poco poco nan tabata hala e cabuya ariba.

Na momento cu nan a yega na altura di e boca di e pos, aki si tabata hopi smal, cu mester sak e cabuya di Genaro un poco abou pa asina nan por hisa e dama ariba prome. Despues di a maniobra poco, nan a logra saca e dama for di e boca di e pos.

E dama tabata for di tino y tabata tin un kap grandi na su cabes, ambulance hopi lihe a hib’e San Pedro Hospital.

Manera nan a hisa e dama sak’e for di e pos, nan a hisa Genaro tambe. Henter e procedura dura casi 45 minuut. Genaro tabata papa soda y morto cansa di tur e tension. Asina mes e tabata felis y contento di por a cumpli cu su deber como un bon boluntario. Salba bida di un mama di tres yiu chikito.

Despues di algun ora di angustia e pos a wordo tapa y e lusnan grandi di brandweer a wordo paga. E publico presente poco poco a cana bay bek cas y e paisahe banda di e santana di Piedra Plat a keda den un silencio.

E  anochi aki Genaro a bira e Heroe di Piedra Plat, e persona hoben cu a salba bida di ser humano, kende ta un mama di 3 yiu y tabata compaña cu su ruman homber.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio