ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e hoben L.L. (19) E ta wordo acusa cu riba 20 September 2021 a tira e homber N.B. den San Nicolas. Fiscal ta considera esaki intento di mata.
ARUBANATIVE por a compronde cu L.L. a resulta di ta victima di bully y dos atraco cu violencia. E dia di e incidente, el a wordo ataca pa dos homber, un di nan ta e victima cu el a tira. Door di tur e bully y violencia constant, el a busca un arma pa defende su mes.
Hues a puntra L.L. si ta berdad e acusacion. Segun L.L. e no tabata intencional. El a bisa cu durante bringamento e tiro a los. Hues a mustra cu e homber N.B., kende a resulta di ta e victima, dia 21 September 2021 a declara na Polis cu nan tabata core den auto y L.L. a cruza caya y keda mira nan. Bob y N.B. a baha y puntra L.L. kico ta e problema. Despues ora el a bay subi auto, el a tende un tiro y sinti algo na su man. A resulta cu el a worde tira den man. Segun L.L., nan a bay riba dje cu un schroefdraai y a lucha cun’e y bay cu su candela. Hues a puntra L.L., pakico e tabata cana arma. L.L. a splica cu e tabata cana arma pasobra e hendenan ey tabata bully e constantemente y tabata atak’e. Segun L.L. el a fia e arma algun dia promer cu e sucedido. Despues di e tiramento el a duna e doño e arma bek. E no kier bisa kende ta doño di e arma pa no hink’e den problema. Segun L.L. ora el a saca e arma durante e luchamento, e arma a tira.
Hues a mustra cu un amigo di L.L. a declara cu L.L. tin problema cu un grupo di Village cu a horta un cadena di dje. E grupo ey a bay na un cas pa bati L.L. cu bate y machete. El a bisa cu dia 20 September 2021, ora el a yega cas, el a haya L.L. ta ward’e y a bis’e cu nan a bringa cun’e. Hues a puntra L.L. si e ta forma parti di un gang. El a bisa cu no. Door cu L.L. ta bay serca amigonan na Pos Chiquito, hende lo ta kere cu e ta forma parti di gang di Pos Chiquito. L.L. ta biba na San Nicolas.
Fiscal a puntra L.L. pakico anterior e no a haci keho. L.L. a bisa cu e no kier pa tin mas problema. Fiscal a remarca cu awor ora e sali for di KIA, e problema lo bay sigui. El a mustra cu L.L. a scoge pa cana cu arma y e problema ta bira mas serio. Fiscal a haci L.L. serie di pregunta encuanto e arma. El a remarca cu e arma no ta tira riba su mes. L.L. a bisa cu un biaha e persona a splica con e arma ta traha pero e no a paga bon tino.
Hues a mustra cu segun e raport di Reclasering ta mustra cu L.L. a bisa cu desde cu su amigo Sami di Pos Chiquito a wordo tira mata, e tin problema cu esnan di Village. L.L. ta pensa cu door cu e tabata amigo di Sami, nan lo tin problema cun’e. Reclasering ta conclui cu e chens ta chikito cu L.L. lo bolbe haci’e. Reclasering ta haya cu mester guia L.L. pa e siña atende y resolve problema.
Fiscal a bisa Hues cu 1 luna promer por a mira riba un video di seguridad, con un grupo, den cual N.B. tabata, a core tras di L.L. cu bate y machete. E doño di e cas caminda e incidente a sosode, a dicidi di yama Polis. L.L. mes no a haci denuncia. Fiscal a bisa cu L.L. a dicidi di busca un arma pa defende su mes, siendo cu e por a informa Polis pa evita mas problema.
Fiscal ta haya proba cu L.L. a tira y tabatin un arma di candela. El a bisa Hues cu for di e raport di Reclasering ta mira cosnan positivo pa L.L. y no cu e ta bayendo den mal caminda. Fiscal a mustra cu pa tira riba un hende tin castigo di 5 pa 6 aña di prison.
Posecion di arma ta un asunto serio y pesey Ministerio Publico ta baha cu man duro. E gangnan na Aruba ta forma peliger pa tur hende. Fiscal a sigui bisa cu pa cana cu arma so ta castiga 2 aña di prison.
Fiscal a bisa cu e ta tene cuenta cu edad hoben di L.L., cu el a wordo atraca, ta promer biaha cu e ta cay sera. E rapport di Reclasering ta convence Fiscal pa duna castigo mas abao pasobra e ta mira cu L.L. tin un futuro. El a exigi 4 aña di prison.