ORANJESTAD – E sospechoso Daury Gonzalez Brito, a presenta den Corte pa duna cuenta pa e delito serio cu el a haci.
ARUBA NATIVE por a compronde cu Fiscal a exigi 10 aña di prison pa Brito, kende ta wordo ta haya culpable di intento di asesinato riba e dama H. y intento di maltrato severo riba e mama di H., V.
E sospechoso Brito ta wordo acusa cu riba 19 Januari 2022, intencional a purba di asesina e dama H. door di puñal’e varios biaha cu un cuchiu na su curpa parti dilanti, mientras cu e mesun dia el a purba di mata e dama V. door di puñal’e varios biaha cu un cuchiu na su braza.
Durante tratamento di e caso a sali na cla cu e dama H. tabata pareha di e homber Brito y nan tabata biba hunto. Na October 2021, e relacion no tabata bon mas y H. a bay biba bek serca su mama V. na de Vuyst. Ambos ta traha den e sector hotelero y parce cu Brito a papia cu un homber cu ta traha na un hotel y el a bisa Brito cu e conoce H. Esaki lo a pone cu Brito a bira jaloers. Dia 19 Januari 2022, Brito a bebe y a bay na e hotel unda H. ta traha den oranan di atardi y cu un cuchiu el a corta e tuitnan di e tirenan di e auto di H. Den oranan di anochi H. a haya un lift cu un colega pa bay su cas ya cu e tirenan tabata baha. Ora e tabata yegando, el a mira Brito ta na cas di su mama ta ward’e. El a dicidi di bay Polis y Polis ya caba a haya notificacion cu tin hende no desea eynan. Polis a dicidi di bay cu H. na su cas y ta papia cu Brito. Esaki tabata mas o menos 9.30 di anochi caminda H. a bisa Brito cu e por tin relacion cu ken e kier. Polis a bisa Brito pa move, cual el a haci tambe. Brito a bay sigui bebe y tur e jaloersi a keda traha riba dje. Pa mas o menos 10.30 el a bolbe bay e cas y el a puñala H. 25 biaha na su lomba, nek, pecho y parti ariba di su curpa. Ora cu e mama V. a bay purba stop Brito, Brito a puñala e mama 2 biaha tambe na braza.
FISCAL
Fiscal ta haya legalmente proba cu riba 19 Januari 2022, Brito a puñala e dama H. y e dama V. E ta considera cu Brito ta culpable pa intento di asesinato y intento di maltrato severo. Fiscal a bisa cu milagrosamente H. a scapa di e 25 hincanan cu el a sufri di Brito. Pa un tempo e no por a cana y mester a haya terapia pa por cana, siña come, haci su necesidadnan. El a mustra cu H. a keda afecta na su mannan, caminda nerva a wordo daña y e no por sera su mannan bon. El a mustra cu e mama V. cu a bay stop Brito di puñala su yiu, tambe a sufri dos hinca na braza. Mirando e seriedad di e caso aki, el a exigi 10 aña di prison, kitando e tempo cu Brito ta sera den KIA.
Hues a sera tratamento di e caso y a bisa cu e ta bay studia e caso bon y dia 13 Mei 2022 lo tin sentencia.