Problema ta parse di no a caba: Drive-By Shooting ariba cas di Sammy Ignacio

No ta laga e defunto sosega na paz, despues di mas cu un aña morto y tur esnan envolvi a haya nan sentencia, parce cu e problema no a caba.

Pos Chikito – Dialuna algo prome cu 7’or di anochi, presencia di polis a wordo pidi na un adres na Pos Chikito cu urgencia.

Un Nissan March cu dos persona den dje a drenta den e caya coriendo poco poco y despues a reis e motor varios biaha duro pa despues  para dilanti di cas di defunto Sammy Ignacio y ta los como 3 pa 4 tiro riba e cas.

Na e cas na banda na momento cu e chauffeur a los e tironan, tabata tin varios persona den e cura incluyendo muchanan chikito. Segun testigo e persona den e March na banda drechi mes ta esun cu a los e tironan.

Aparentemente e habitantenan di e cas a reconoce ambos persona den e Nissan March.

Varios unidad di polis a yega na e sitio y e  caminda a wordo cera mesora. Mientras e otro patruyanan a cuminsa core rond y ta buscando e Nissan March cu ta envolvi den e tiramento.

Recherche di districto di San Nicolas y Departamento Tecnico tambe a presenta na e sitio, pa haci mas investigacion.

Den e tiramento aki e personanan den e Nissan March muy probablemente lo a usa revolver.

Kiko por ta e motibo cu e dos personanan aki ta pasa los tiro ariba e cas aki no ta conoci, pero na mesun momento ta un indicacion fuerte cu tin algo serio pasando of pa bay pasa.