ORANJESTAD – Diahuebs merdia, minister di Husticia y Asuntonan Social Sr. Rocco Tjon, a firma oficialmente e MOU hunto cu European Family Justice Alliance y Family Justice Center Aruba. E MOU aki tin un impacto positivo pa Aruba pa diferente motibo, esaki ta un iniciativa pa brinda un miho cuido y servicio na victimanan di violencia en general. Banda di esaki, e ta hopi importante tambe, mirando cu e ta un stap mas padilanti, caminda nos ta bay haya e guia necesario pa nos por yega na concretisa e Family Justice Center di Aruba.
Ta asina cu na Europa tin hopi conocemento caba riba e tereno aki, pa cual motibo a colabora cu European Family Justice Alliance caba den pasado den dunamento di training pa tur e profesionalnan aki na Aruba. Cu firmamento di e MOU aki, nos ta garantisa cu e tipo di ayudo y asistencia aki di parti di European Family Justice Alliance por continua den futuro. E parti di mas importante di e acuerdo aki ta, cu nos ta formalisa Family Justice Center Aruba y reconoce su existencia, pero tambe nos ta reconoce e importancia di nos partner Europeo; European Family Justice Alliance. Banda di esaki, nos lo garantisa fondonan internacional pa yuda nos combati e fenomeno aki y abuso en general, pero tambe abuso sexual di mucha. Tambe nos lo garantisa fondonan necesario pa por keda brinda e trainingnan cu ta necesario pa nos profesionalnan cu ta haciendo un tremendo trabou caba pa cu esaki.
Por ultimo, e ta bunita pa añadi cu Aruba ta un di e lidernan den establece un Family Justice Center aki den Caribe, caminda recientemente nos tawata tin e privilegio di duna un man na nos hermana isla Boneiro, pa asina nan tambe por yega na un Family Justice Center. Diferente accionnan ta tumando luga pa amplia y duna mas balor na e Family Justice Center di Aruba, manera por a tuma nota, recientemente a duna un training na e Jeugd en Zeden Politie como tambe algun psicologonan riba e tematica di “waarheidsvinding” den casonan di abuso y violencia. Tambe, den luna di Maart, Dr. Vincent Latour a inicia su estudio den exterior, pa asina bira e prome dokter forensico specialmente pa Aruba, pa asina añadi aun mas balor, na e proceso cu ta tuma luga ora cu casonan di abuso bin padilanti.