Empleado J. Bito deteni un rato prome na pia di trabou, treci Sero Pita hunto cu recherchenan

Sero Pita – Diabierna durante dia polisnan di Project Team Drugspanden tawata bezig un biaha mas, “pikiendo” esnan cu ta haci nan mes culpabel cu sea traficacion y/of bendemento di droga.

Algun rato prome na Sabana Blanco

Den e caso aki na Sero Pita, polisnan a trece e empleado J. Bito kende a wordo aresta na pia di trabou na Sabana Blanco un rato prome. E sospechoso ta conoci bou di e nomber Taliban.

Por a mira e empleado di e compania den su uniform y den boei.
No ta conoci si e cas na Sero Pita ta su cas of di su amiga.

Pero polisnan a trece na e cas unda cu por mira cu nan tawata busca rond y cu e sospechoso canando cu nan.
Momento cu nan a termina cu e ristamento paden y rond di e cas, transportwagen a yega a hiba e sospechoso J.Bito direccion warda di Shaba.

Na e cas por a mira un auto di recherche cu aparentemente lo tawata tin un dama di fam D. kende tambe a wordo aresta un rato prome na Departamento di Impuesto (DIMP). Ambos sospechoso a wordo deteni pa investigacion, nan detencion ta relaciona cu un caso di droga.

Pues asina nos por mira cu polisnan ta man yen cu adresnan y hendenan cu ta biba di e negoshi di droga.
E indice di e grupo aki ta halto, pero si tin un cooperacion mas estrecho entre tur e departamentonan concerni por tackle e problema aki mas efectivamente.

Debi cu no ta mustra tin un fin cerca na horizonte di e problema serio aki, unda cu e droga no matter what ta keda drenta e isla. Y ta aki esta e grens mester wordo miho controla y obviamente polis so no por haci esaki.