Realidad ta cu e prijs mundial di gasoline ta wordo determina pa e prijs di e bari di petroleo
Den e ultimo lunanan nos por a wak e prijs di gasoline subi cu aumentonan gigantesco y esaki ta debi na e aumento constante di e prijs di e bari di petroleo riba mercado mundial. Esaki na su turno ta haci e gasto di transporte en general subi substancialmente y asina ta provoca un aumento di gasto di produccion y producto den fabricanan. Niun hende ta gusta esaki y hopi hende ta keha mundialmente, sinembargo nos ta compronde cu gobiernonan no por controla esaki. Specialmente pasobra hopi pais a haya sla economico fuerte pa dos aña di e pandemia y ainda ta recuperando. Esaki ta conta pa Aruba tambe. Como pais no tin espacio pa absorbe nada mas pasobra nos economia y debenan ta hopi grandi. Mi kier a pinta e panorama aki pasobra e ta esencial pa cada ciudadano compronde nos realidad y con nos a yega akinan y pakico e situacion ta asina delicado;
- AVP su gobernacion a laga nos pais endeuda cu mas di 80% di nos GDP. Esaki a provoca cu nos pais no tabata tin un “cusinchi” financiero, si pais Aruba lo a hay’e den un emergencia of calamidad. Mike Eman a bay laga un Aruba vulnerabel y endeuda atras.
- Covid-19 a bin bati na nos porta. Pandemia a laga pais Aruba sin entrada pa basta luna, obligando gobierno pa busca ayudo financiero na Hulanda fiando 1.2 Biyon florin y impulsando nos na 115% di debe compara cu nos GDP. Den otro palabra, nos situacion di deuda a keda insostenibel.
- E guera di Rusia y Ukraina a manda prijs di petroleo masha halto. Aworaki e ta na $120 pa bari. Aña pasa ainda e tabata bao di $75 pa bari.
- Prijs di flete y produccion di producto a wordo afecta. Alimentonan a subi.
- Prijs di gasoline na Hulanda ta na 5 florin pa liter, Prijs na Merca ta serca di 2.43 florin pa liter, cual normal mente ta entre $2-$3 pa gallon! Prijs na Alemania 3.80 florin p/l, Israel 4.01florin p/l, Barbados 4.02 florin p/l, Grecia 4,55 florin p/l y asina nos por sigui.
E crisis aki cu Aruba ta confrontando no ta algo cu gobierno a scoge pe. E ta algo cu globalmente ta afectando tur pais y consecuentemente tur ciudadanonan. Gobierno a logra pa cuminsa restaura e 5% di salario cu empleadonan publico tabata contribui tur luna na nos economia di un forma solidario. Pa 2023 lo restaura e 12.6% completo manera a wordo palabra. Nos ta conta cu den e reunion di Rijksminister Raad esaki lo wordo confirma na final di Juni. Ta pa e motibo aki nos di fraccion di MEP ta sigui contribui e 25% na nos economia pa e empleadonan publico por haye bek prome. Gobierno lo sigui reuni pa wak unda mas por trece alivio pa nos pueblo cu ta pasando den momentonan hopi dificil.
Si pueblo desea mas informacion di e articulo aki, contact mi na tel: 528-4639 of email mi na: [email protected] / Bo parlamentario y sirbidor di pueblo na bo ordo semper!