Ministerio di Transporte, Integridad, Naturalesa y Asunto di Grandinan
t.a.v. Minister Ursell M. Arends
Bestuurskantoor
Lloyd G. Smith Blvd 76
Oranjestad
Aruba
Oranjestad, 14 juli 2022
Topico: aumento di tarifa di autobus
Apreciabel minister Arends,
Pa medio di e carta aki nos, e chauffeur nan di Autobus Uni, kier trece pa dilanti e propuesta pa aumenta nos tarifa pa autobus cu 1 florin inmediatamente. Den e carta aki nos lo splica e motibo di nos peticion.
Nos ta na altura di e estudio conduci door di Universidad di Aruba cu su Excelencia a laga hasi tocante e relacion entre aumento di tarifa di combustibel y e ahuste di tarifa di autobus. E estudio aki lo termina na september di e aña aki. Nos ta agradecido cu su Excelencia ta tuma nos preocupacion tocante e aumento continuo di tarifa di combustibel na serio pero lamentablemente keda warda te cu september pa e resultado nan di e estudio aki no ta sostenibel pa nos di Autobus Uni.
Mundialmente nos ta wak un aumento den e tarifa di gasolin y diesel. Na Aruba esaki no ta un excepcion. Desde inicio di aña 2022, pa februari pa ta exacto, nos a mira un aumento den e tarifa di diesel (y gasolin) tur luna. Desde februari 2022 Aruba a sa di kibra e record pa cu e tarifa di diesel tur luna. Den luna di juli e tarifa di diesel a aumenta cu 22.4 cent, cual ta hasi cu pa cada liter di diesel nos ta paga riba e dia di awe 312.7 cent. Den e tabel presenta akibao por mira e tarifa nan y e aumento mensual di diesel pa cu aña 2022.
Luna 2022 Januari Februari Maart April Mei Juni Juli
Tarifa pa L den cent 195.00 214.10 228.80 274.50 289.00 290.30 312.70
Aumento den cent – 19.10 14.7 45.7 14.5 1.3 22.4
Den aña 2021 e tarifa di mas halto paga pa diesel tabata 209.0 cent pa liter den e luna nan di oktober y november. Comparando e tarifa actual cu e tarifa di mas halto di aña pasa por constata un aumento di mas cu 1 florin (103.7 cent pa ta exacto). Esaki ta un aumento di casi 50% (49.6% pa ta exacto). Y compara cu e tarifa di 1 aña atras – juli 2021- cual tabata 188.70 cent, tin un aumento di 65.7%. Durante e subida di tarifa di combustibel e ultimo 7 aña nan nunca e tarifa di autobus a subi. 1 di februari 2015 nos tarifa a subi pa 3 florin y e tarifa ey nos a keda cune te den presente. Si tuma e averahe di e tarifa nan di aña 2015 y compara esaki cu e tarifa nan di e aña aki por bisa cu tin un aumento di 100% (por mira e tarifa di aña 2015 den e anexo). Di e dato aki por conclui cu e tarifa di 3 florin no ta sostenibel mas pa e chauffeur nan di autobus. Y esaki ta djis mirando e aumento di tarifa di combustibel, lagando afo otro factor nan cual tambe ta subiendo, por ehempel seguro di autobus. Na e momento nan aki nos ta coriendo cu perdida.
Pa hasi e situacion sostenibel pa nos, nos como chauffeur nan di autobus tin cu traha ora nan extra diariamente. Esaki sigur no ta faborabel pa nos salud, nos bida familiar y social y sigur tampoco pa e seguridad di trafico pa motibo di hornada nan largo.
Nos ta pidi su Excelencia tene na consideracion nos peticion tocante e aumento di tarifa pa cu autobus.
Sperando cu nos a informa su Excelencia debidamente y cu nos peticion por keda atendi lo mas pronto posibel. Nos lo ta en espera di un contesta positivo.
Atentamente,
Chauffeur nan di autobus Uni.
Anexo
Tarifa nan di diesel den aña 2015 y e averahe di tarifa den 2015
Luna 2015 Tarifa pa L
den cent
Januari 152.50
Februari 141.90
Maart 155.50
April 150.40
Mei 153.10
Juni 160.60
Juli 157.30
Augustus 149.00
September 140.40
Oktober 139.50
November 138.40
December 135.00
Averahe 147.80
