E mester bay haya tratamento obligatorio na Hulanda
ORANJESTAD – Awe mainta Corte di Husticia, via video conference a dicta sentencia den e tristo caso caminda Jason Mathilda (32) a tira su tata mata.
ARUBANATIVE por a compronde cu Hues a baha e exigencia di castigo di prison cu Fiscal a exigi pero a confirma e parti di tratamento obligatorio.
FISCAL
Luna pasa tratamento di e caso a tuma lugar caminda Fiscal a bisa Hues cu e ta haya cu intencionalmente Jason a tira mata su tata riba 13 December 2021. Despues el a tira e arma afor den mondi. 26 Juni 2022, Polis a haya e arma y Jason a reconoce esaki. Fiscal a mustra cu durante investigacion den e apartamento, Polis a haya 409 bala Cal. 22 rifle y 4 bala 9 mm.
Fiscal a bisa cu psycologo y psychiater a mustra cu Jayson tin problema mental anti social. Nan ta haya cu e ta menos responsabel pa su actonan. Nan ta haya cu Jayson mester di un tratamento intensivo y largo. Nan ta recomenda tratamento obligatorio. Fiscal a exigi 10 aña di prison y TBS sin limite.
SENTENCIA
Awe mainta Hues a bisa cu e ta haya legalmente proba cu Jason riba 13 December 2021 a tira mata su tata E.C.Mathilda. Tambe Hues ta haya Jayson culpable di posecion di un arma di candela y hopi bala cayente.
Pa cu e castigo Hues a bisa cu e ta tene cuenta cu Jason a tira mata su tata. El a bisa cu Jayson a kita e cos mas valioso di e victima, esta su bida. Esaki a causa hopi tristeza pa e famia. Hues a bisa cu mata ta e crimen di mas serio cu ley conoce. Comunidad ta keda conmovi pa hecho asina.
ACUSADO TIN DUELE DI LOKE EL A HACI
El a mustra cu posecion di arma di candela ta causa peliger pa comunidad. Hues a bisa cu e ta tene cuenta tambe cu antes Jayson a kita bida di un persona caba. Tambe Hues a tene cuenta cu Jason tin duele di loke el a haci y cu e ta sufri pasobra el a mata su tata.
MESTER DI TRATAMENTO PSYCHIATRICO OBLIGATORIO
Hues ta haya cu mester duna castigo severo. Tambe Hues a tene cuenta cu despues di e castigo di prison, Jayson mester haya tratamento obligatorio. Hues a tene cuenta cu raport di psycologo y psychiater. Ambos ta haya cu Jayson tin problema di personalidad serio y problema anti social. Nan ta conclui cu e problemanan aki tabatin influencia riba loke a sosode. Nan ta haya Jayson menos responsabel pa loke el a haci. Nan ta haya cu e chens ta grandi cu den futuro e lo bolbe haci algo asina. Nan ta conseha TBS sin limitacion.
CASTIGO
Hues a bisa cu e ta sigui e conseho di e psycologo y psychiater. Pa loke ta TBS esaki no tin un limitacion.
Hues a condena Jayson na 9 aña di prison kitando tempo cu e tempo cu e ta sera den KIA y TBS na Hulanda. Hues a ordena cu despues cu Jayson sinta 6 aña di prison, lo mester percura pa e haya e tratamento obligatorio (TBS) na Hulanda. Hues a ordena tambe cu mester destrui e arma di candela y balanan.