Oranjestad:
Diahuebs y diabierna ultimo, un team di recherche, acompaña pa Ministerio Publico a haci entradanan hudicial na 4 adres rond di nos isla y a detene 5 persona como sospechoso pa sexting, blackmailing y labamento di placa.
E caso aki ta uno grandi y den cual un cantidad di persona riba nos isla a bira victima di e grupo aki. E victimanan a bay entrega keho y asina a start un investigacion, cu a dura varios luna. E investigacion tabata dirigi riba afpersing ( blackmail ), y participacion den un organisacion criminal.
E persona nan deteni ta:
Un hende muher di inicial A.M.T.M. naci na Republica Dominicana
Un hende homber di inicial D.J.L.K. naci na Aruba
Di dos hende muher di inicial Z.A.R.A. naci na Venezuela y e di dos hende homber di inicial A.R.G. naci na Aruba.
E homber di inicial A.R.G. naci na Aruba, tabata candidato di un partido politico chikito cu a participa na elecion 2021. E persona aki ta bon conoci den nos comunidad, vooral den temporada di Carnaval cu e ta hopi activo.
E organisacion criminal aki cu e politico aki ta forma parti di dje, tabata aserca nan victimanan den forma di basila y cu supuestamente lo ta gusta nan y asina cu nan gara confiansa cu nan victimanan, nan ta cuminsa pidi e victima pa mandanan video of portretnan sunu, of di actonan sexual. Manera cu nan logra haya e grabacionnan of potretnan den nan poder, e grupo aki tabata cuminsa menasa nan victimanan cu si nan no paga un suma di placa, e grabacionnan of potretnan aki lo wordo publica riba medionan social of lo manda esakinan pa nan casa, yiunan of demas famia. Esaki ta pone e victima den un posicion hopi vunerabel y cu hopi berguensa pa evita cu esaki sosode, nan tabata paga miles y miles di florin na e organisacion criminal aki.
E investigacion ta andando y tin tur atencion di autoridad, no ta descarta cu mas detencion lo por cay. KPA Y OM ta pidi comunidad pa no cay den e weganan aki.
Evita di manda potret of video explicito di bo, pa otro persona cu bo no conoce bon of ni conoce mes, mandando esaki e chens ta grandi cu bo tambe lo por bira victima di sexting y blackmailing. Evita berguensa y perdemento di placa, no cay den trampa di e tipo di weganan aki.