A.T.A.: Europa mercado cu reto y oportunidadnan di entre otro Inglaterra, Scandinavia y Suiza.
E siman aki diferente miembro di ekipo di A.T.A. di Aruba y Europa, como tambe AAA, AHATA y socionan den industria turistico ta presente na Berlin, pa asisti na e feria di biahe ITB Berlin, pa prome biaha den 3 aña den forma presencial.
ITB ta trece profesionalnan den mundo di biahe hunto y tin como meta pa duna oportunidad pa socionan existente den e industria topa y fortalece relacionnan y a la vez ta habri porta pa socionan nobo posiciona nan mes.
Den transcurso di e siman, e ekipo di A.T.A. lo reuni cu diferente aerolinea manera Ving, Alpitour, y KLM. Tambe lo reuni cu representante di hotelnan y Tour Operadornan di Europa y cu socionan di AHATA referente e mercado di Europa y cu e agencia di publicidad di A.T.A. pa Europa, esta DEPT.
E booth di Aruba ta conta cu presencia di 8 diferente hotel, tour operador y compania di Aruba cu a atende e evento. Esaki sigur ta un bon indicacion di e interes cu tin pa e mercado aki. 2023 ta inclui retonan pa e mercado aki, como tambe oportunidadnan.
British Airways
E oportunidad clave ta inroduccion di British Airways cu vuelonan directo entrante 26 di maart. E meta ta pa crece e mercado di Inglaterra cu 25.56% na 2023 compara cu 2019.
Ving cu vuelo non-stop di Suecia y enfoke ta continua riba Suiza
Tambe ta contento di informa cu Ving lo ta operando un vuelo non-stop for di Suecia for di october di e aña aki te cu maart 2024. E vuelo aki lo dirigi su mes riba e mercado di Noruega tambe, cual ta brinda mas oportunidad pa sigui diversifica. Mester agrega cu a finalisa investigacion necesario pa asina sigui defini strategia pa e mercado di Suiza, cu ta un mercado cu ta parti di A.T.A. su mercadonan pa investiga y posiblemente amplia den 2023/2024, incluso contando cu vuelonan debido. Esaki lo sigui haya atencion durante ITB.
E mercado Europeo a sera cu un grado di recuperacion di 95% compara cu 2019 y e meta ta pa sigui crece e aña aki. Na januari 2023 98,942 bishitante stayover a yega Aruba. Entre nan 6,562 bishitante, cu ta 6.6% a bin for di Europa. E 3 mercadonan di Europa cu a trece mas bishitante Aruba den januari 2023 tawata Hulanda, Suecia y Alemania. E aerolinea mas grandi for di Europa ta KLM cu tawata tin 3.0% di e cantidad total di bishitante den januari 2023.
A.T.A., AAA, AHATA y socionan den industria lo sigui traha hunto pa yega na e recuperacion y crecemento den cada un di e mercadonan aki.