Oranjesta 10 di maart2023. Diadomingo cu a pasa Sportvereniging Aruba Juniors a continua cu su Torneo Himno y bandera cu cuater candeloso wega. Den e prome wega den poole B, Boomerang ta gana Bambino 8 pa 3. Esaki ta haci cu Boomerang su record ta 2 gana y 0 perdi cu 6 careda contra. Bambino su record ta 0 gana y 2 perdi. E di dos wega tabata den poole A unda cu Glovers ta blankea Jani’s 7 pa 0. Glovers ta su so na prome luga den poole A cu 2 wega gana y 0 perdi y 0 careda contra.
Jani’s su record ta di 0 y 2. E siguiente wega a bay entre Astros y Tigers. Astros ta gana e wega 8 pa 4. Astros su record ta igual cu di Boomerang, esta 2 gana y 0 perdi y tambe cu 6 careda contra. E ultimo wega a bay entre Surprise y Aruba Juniors. Luis Giel di Surprise a silencia e bateria di Aruba Juniors por completo pa gana e wega cu score di 7 pa 0.
Diadomingo awo 12 di maart lo tin cuater wega unda cu lo dicidi ken ta e 3 teamnan cu lo compaña Aruba Juniors pa hunga e finalnan e weekend di 18 y 19 di maart 2023. Bonaire Stars y Los Amigos di Corsou lo ta di bishita pa hunga e finalnan. E prome wega di diadomingo awo lo cuminsa 9:30 y lo ta entre Surprise y Jani’s. Sigui pa Astros y Boomerang. E prome dos weganan lo bira hopi intresante pasobra esnan cu haya menos careda contra lo por clasifica. E di tres wega lo ta entra Glovers y Aruba Juniors. Y e ultimo lo ta entre Bambino y Tigers.
Pa 4:30 lo tin un wega di 50 plus cu lo bay entra Deco’s y Surprise. Si bo ta gusta wak bon wega di softbal, ta na Aruba Juniors bo mester ta diadomingo awo. Bar y cushina lo ta bon surti manera Aruba Juniors so por. Nos ta warda bo.
