Freudenberg, Alemania:
Diasabra den oranan di atardi un mucha muhe yama Luise a bay bishita un amiga y a sali for di e cas di su amiga pero nunca a yega bek su cas. Su mayornan mirando cu oranan tabata pasa y nan yiu no a yega cas, a dicidi di bay polis. Despues di un buskeda rigoroso, diadomingo nan a bin topa cu e curpa sin bida di Luise den un mondi entre dos cas cerca di un fietspad.
Diasabra durante dia Luise di 12 aña a bay bishita un amiga y 5’or y mey di atardi e la sali for di su amiga su cas, pa bay cas bek. Lamentabelmente nunca e la yega cas. Despues cu su mayornan a bati alarma, autoridad a cuminsa cu un buskeda rigoroso den un mondi entre dos cas. Diadomingo durante dia, nan a bin topa cu e curpa sin bida di Luise. E curpa mesora a keda confisca, pa motibo cu e momento ey ainda no tabata sa, kiko tabata e circumstancianan rond di su morto.
Mesora a cuminsa cu un investigacion, dialuna a haci un autopsia yna bin resulta cu Luise a wordo mata na un forma hopi violento. Diamars durante dia autoridad a detene dos sospechoso, cu ta dos mucha muhe di 12 y 13 aña.
Durante un conferencia di prensa, polis y ministerio publico Aleman a duna mas informacion di e caso aki. Pero e informacion duna tabata hopi limita, pa motibonan di privacy y protecion di menornan. Nan a splica cu e mucha muhe a fayece despues di a ricibi varios hinca y a wordo laga atras ta sangra y cu consecuencia cu e la fayece. E lugar caminda e sucedido cruel aki a pasa ta caminda cu e la wordo haya tambe. No tin niun indicacion cu por ta trata di un crimen sexual.
Pruebanan cu a wordo haya y e informacionnan ricibi for di interogacionnan haci, autoridad a haya motibonan suficiente pa detene e dos mucha muhernan aki como sospechosonan principal di asesinato di Luise. Durante e conferencia di prensa autoridad local a sigui bisa cu e ta un caso hopi impactante, tambe nan a pone bon cla cu tur cos ta mustra cu no tabata tin un tercer persona envolvi. E arma cu a wordo usa pa asesina Luise, te na e momentonan aki no a wordo haya, pero autoridad local ta sigui busca esaki.