Oranjestad 15 di mart: Manera tur mucha, Ferdinand a cuminsa hunga bala cu amigonan den bario na San Nicolas. Cu su 14 aña el a drenta e team di Don Bosco división Junior League cu tabata maneha pa coach Baly. El a hunga dos aña Cu Don Bosco Juniors League. Aki ta unda Gabby Illidge (qepd) kende tabata Manager/Player di Schlitz a scout Ferdinand y a puntre pa e bin hunga den Schlitz dobbel A. Cu Apenas 16 aña Ferdinand a subi dobbel A y ta topa hungadonan estelar manera Elston Simmons y Buga Blijden. Despues di dos aña den Schlitz e ta bay Sint Maarten pa trabou unda e ta keda 3 aña. Den e tres añanan aki e ta hunga baseball dobbel A pa entre otro Sea View Hotel y GeBe. Bek na Aruba Ferdi ta bolbe hunga cu Gabby Illidge pero e biaha aki den Amstel cu después ta cambia di nomber y ta bira White Label. Den White Label el a hunga cu Charles “Pepitone” Flanders, Toby Abraham y James “Bubblegum” Hazel entre otro. Ora cu White Label a desintegra el a pasa hunga pa Heineken. Den Heineken el a forma e staf di pitcheo hunto cu entre otro Antonio Gomes y Buchi Boasman. Despues di un trayectoria di 29 aña Ferdinand ta retira di baseball cu 45 aña di edad. Ora e manager di Sugar Kings a tende cu Flanders a retira di baseballel a buske mes ora pa join su team como all arround player. Cu 50 aña e ta pasa hunga den e team di San Nicolaas Sluggers y después difunto Bubeis Gomez ta hibe Astros. Na 2013 Aatje Williams ta puntra Ferdinand pa bin hunga cu Aruba Juniors. E ta hunga un aña den Liga 50 y despues ta pasa pa Liga 60. Ferdinand ta conici como un hungado cu ta hunga diferente posición den tanto outfileld como infield. Su bate Semper ta on y ta bati riba 300 di average tur aña.
Otro persona hopi aprecia den e mundo di softball ta e conocido DJ Gordon Toisaint
Gordon semper a gusta scucha música como tal e tabatin un bon sistema di sonido na cas. Tur cos a cuminsa na 1975 ora cu un ruman di Gordon a gradua como verpleegster y el a pidi Gordon pa bin cu su sound system pa toca durante un encuentro cu el a organiza. E sistema di sonido no a bay cas mas pasobra ta tur fin di siman e amiganan a keda puntr’e pa toca na nan cas. Esaki a dura 7 siman. Despues Gordon a cuminsa toca fiestanan den Dominica Club na Tarabana y tambe ora tabatin weganan di domino diasabra y diadomingo. Despues Gordon a haya un contract cu Divi Divi Hotel como entertainer y DJ. Por ta hopi no sa pero Gordon a hunga softball pa DOW Pampers hunto cu Victor Albus y Juan Martijn entre otro coleganan di DOW. E tabata hunga e posición di centerfield. Cu DOW el a hunga varios biaha na Corsou. Na 1981 Ronny Gomez, kende ta un organizado di torneo di softball, a invita Gordon pa un diadomingo bin pone musica na su torneo na veld di Montaña na Noord. Gordon ta conocí pa ti un repertorio di música masha amplio y hopi varia. Door di su experiencia como entertainer na Divi Divi el a bin na e idea pa locuta wega durante torneo. Eynan el a topa cu difunto Ten Ten Tromp kende a join Gordon cu locución di weganan di softball. No a dura hopi cu Gordon a bira un atracción na weganan di softball entreteniendo e publico cu tabata bin veld. Esaki a crea un ambiente diferente pasobra e locución tabata cu hopi joke pero toch serio. Gordon a bira e homber di ambiente na torneonan di softball. No tabatin un veld na Aruba cu Gordon no a toca. Pa un torneo ta exitoso Gordon mester tey cu su música y su mike. Dado momento e trabou a bira asina exigente cu e mester a busca dos mucha pa yud’e. Raymond Jansen cu Mariano Thiel a join e team di Gordon como dj. Esaki a duna Gordon espacio pa dedica full time na lucucion y entretene e fanaticada grandi cu tabata bin veld. Veldnan di Flatstone bieu, Alto Vista y después Kibaima na Tanki Leendert tabata rondona cu hende ora Gordon entretene. Na Kibaima e ambiente tabata sigui después di wega cu bailamento cu su música. Tambe Gordon a toca varios biaha pariba di brug na Veld di La Fama y Arandas na San Nicolas. Comienso di añanan 90 Famia Gomez a lanta veld di Astros na Pavia. Astros a bira e cas nobo di Gordon. Pa varios aña Gordon a toca y entretene weganan local e internacional ey riba. Despues cu e veld di Astros a wordo desmantela, el a entrtetene na Veld di Caribe pa varios aña mas. Por bisa cu Gordon a entretene durante weganan local, internacional y Antiyano. Tambe Gordon a inspira varios persona pa cuminsa toca na veldnan y fiestanan di famia. Pa menciona algún Mike’s Disco, Go Go Disco y Raymond Jansen.Banda di su trabounan riba veld como entertainer, e tabata presidente di Survival Softball Team como 15 aña. E aña cu Survival a gana Astros y a titula campeón di Copa ABC, Gordon a retira como presidente di e team.
Diasabra awor riba 18 di mart lo rindi homenaje na e dos personanan aki na Aruba Junrios pa 2or pm. Amigo y amantenan di softball ta bon bini pa celebra cu nos Dia di Himno y Bandera den gran forma. Bar y cushina manera semper lo ta bon surti.
