ORANJESTAD – Awe mainta Hues di Corte den Promer Instancia a bisa cu e ta haya e agente di Polis, d C. culpabel di a viola secreto di trabao y a mal usa su funcion como agente di Polis.
ARUBA NATIVE por a compronde cu d C. lo a bisa un hende kende ta doño di un auto cu e hende tabata kier.
VIOLA SECRETO DI TRABAO
Algun siman pasa tratamento di e caso a tuma lugar caminda Fiscal a acusa d C. di intencional trahando como agente di Polis, a pasa informacion secreto cu e tabata dispone di dje na e homber H. Esaki a sosode entre 1 Juli 2022 y 31 Juli 2022.
ABUSA DI FUNCION
Fiscal tambe a acusa d C. di a mal usa su funcion di Polis.
CASTIGO COMBINA
Hues den su sentencia a bisa cu d C. su abogado, mr. Mohamed, a mustra cu e persona no a haci keho y como tal mester declara Ministerio Publico no admisibel pasobra no tin keho haci. Hues a rechaza esaki.
Hues a mustra cu ora ta trata di un agente di Polis, no mester tin keho. Hues a bisa cu Polis tin informacion confidencial di hende pa haci trabao publico. Na opinion di Hues, e hecho cu d C. a bay duna informacion di adress di doño di un number di auto na e homber H., esaki ta violacion di e secreto di trabao.
Hues tambe a rechaza e defensa di abogado cu e homber H. no a haci nada contra e persona. Hues a bisa cu e ta considera esaki un asunto serio. El a mustra cu e persona H. tin un carchi di castigo.
Pa cu e castigo, Hues a bisa cu e ta tene cuenta cu d C. a daña e confianza cu hende mester tin den Polis. Hues a tene cuenta cu castigo cu Hof ta duna. Tambe Hues a tene cuenta cu ta promer biaha cu d C. ta cay den man di husticia y cu e castigo lo por tin consecuencia pa d C. su trabao.
Hues a condena d C. na 2 luna di prison condicional, cu 2 aña di prueba. Tambe Hues a condena d C. na 100 ora di trabao pa comunidad y si no cumpli cu esaki, e mester bay 50 dia sera.