June 7, 2023
Local

Y esaki ta djis e comienso… Fundacion Go Cultura ta desata poder creativo den encuentronan cu Aruba su Industrianan Cultural y Creativo

 

Cu hopi entusiasmo Fundacion Go Cultura ta presentando un serie di encuentro exitoso y impactante desde luna di april pa artistanan, creativonan, visionarionan, empresarionan cultural y creativo y tambe educadornan arubano.
E exito rotundo di e sesionnan aki ta un prueba di e importancia inmenso di fomenta conexionnan util y di empodera nos comunidad creativo.
Mas di shen individuo di e Industrianan Cultural y Creativo (CCIs) ya a atende e sesionnan transformado aki, impulsando un revolucion creativo vibrante riba e isla.

E sesionnan aki a resulta di ta esencial pa e avance di nos comunidad artistico.
Na prome lugar, nan ta provee un plataforma dinamico pa artistanan y creativonan por bini hunto y comparti nan experienca, idea y retonan den e industria.

Na di dos lugar, e encuentronan aki ta fomentando e creacion di relacionnan robusto y rednan mas estrecho den e industria. E poder di aliansa y colaboracion ta birando cada bes mas evidente, ofreciendo beneficionan inmenso na artistanan y creativonan, como tambe e industrianan den nan totalidad. Hunto, nos por logra cosnan grandi.

Na di tres lugar, e sesionnan aki ta resulta sumamente poderoso den e conscientisacion tocante e impacto profundo cu e industrianan aki tin riba comunidad en general. Uzando ehempel concreto di paisnan den region cu por demostra cu evidencia con nan a impulsa un desaroyo sostenibel impactante door di reconoce e balor di nan Industrianan Cultural y Creativo. Haciendo esaki, Go Cultura ta demostra e urgencia di formalisa y desaroya Aruba su Industrianan Cultural y Creativo. No solamente pa e sector pero tambe pa desaroyo y bienestar di Aruba den su totalidad.

Sinembargo, e encuentronan aki tambe a trece na luz di dia varios reto cu artistanan y creativonan den e industrianan aki ta confronta. A traves di un dialogo habri, por a identifica dificultadnan, frustracionnan y desapuntonan comun.
Remarcabel ta cu varios di e problemanan expresa door di e comunidad creativo ta keda resalta continuamente durante tur e encuentronan aki. Algun di nan ta: limitacion di fondo y accesibilidad na esaki pa ehecuta proyectonan, necesidad pa adkeri mas conocemento of asistencia den mehora e forma con ta haci peticion pa fondo, acceso inadecuado na recursonan y infrastructura, necesidad di incentivonan pa stimula crecemento di e industrianan, derechonan di propiedad intelectual y e necesidad crucial pa reconocemento, respet y sosten di gobierno y otro stakeholders.

No obstante esaki, meymey di tur e retonan aki, Fundacion Go Cultura ta hopi entusiasma pa sinti e boluntad inmenso di artistanan y creativonan pa colabora mas cu otro pa crea mehoracion pa e industria.
Tambe ta tumando accion pa como colectivo desaroya solucionnan innovativo y cuminsa crea strategianan pa impulsa progreso y crecemento.
Go Cultura ta generando entusiasmo y sosten amplio door di expone e trabao y potencial remarcabel di nos artistanan y creativonan y tambe door di destaca e beneficionan social y economico profundo cu e industrianan aki ta genera.

E mensahe cu ta resonando ta hopi cla: Na momento cu descubri y realisa e balor y potencial di Aruba su sectornan cultural y creativo y dicidi di inverti den nan, nos lo ta invertiendo den un futuro prospero.

Concluyendo, e encuentronan aki ta sirbi como catalisador vital pa desaroyo y crecemento di e Industrianan Cultural y Creativo di Aruba.
Door di activamente identifica retonan, establece rednan solido y fomenta aliansanan impactante, e sesionnan aki ta sigui construi e caminda pa un ecosistema vibrante cu ta berdaderamente sostene y apoya artistanan y creativonan pa asina nan por prospera.

E encuentronan aki ta habri caminda pa e proximo iniciativa di Fundacion Go Cultura cu lo ta un investigacion profundo pa colecta data pa asina por demostra cu evidencia, e potencial real di Aruba su Industrianan Cultural y Creativo pa cu desaroyo economico, social y cultural.
Go Cultura ta invita e comunidad artistico y creativo di Aruba pa ban sigui atravesa un era transformado di imaginacion, innovacion y inspiracion y crea un futuro mas briyante hunto, caminda creatividad no tin barera.

 

Related Posts

%d bloggers like this: