ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e homber Dominicano M.(37). E ta wordo acusa di a mishi cu un dama ariba parkinglot di Arubus. Fiscal ta haya cu M. ta culpabel di a mishi na un dama y a saca su parti intimo pa e dama mishi cun’e.
ARUBA NATIVE por a compronde cu M. na 2018 a wordo condena na 4 aña di prison pa a abusa di un dama. Ainda M. ta para riba cu den e caso ey, e ta inocente.
MISHI CU DAMA
Fiscal a bisa cu e acuscion contra M. ta cu riba 13 December 2022, el a mishi cu e dama S. bao su paña mientras cu M. a saca su parti intimo. Ora Hues a puntra M. si e acusacion ta berdad, el a desmenti. Segun M., e conoce e dama caba pa un aña. E anochi ey tabatin un fiesta di fin di aña di empleadonan di un hotel. M. a wordo invita door di un empleado. Na e fiesta M. a papia y kier a baila cu S. Nan tabata den un grupo. Despues di fiesta a keda papia afor. M. a bisa S. cu e kier sali cun’e un otro biaha. S. a bisa M., mirado su relacionnan anterior, e ta prefera di no tin un pareha. A keda papia y despues a bay na un parkinglot di Arubus caminda tin hendenan ta skate. Na e lugar, na dado momento M. a bay para tras di e dama S. y S. su mama. Segun M., el a pone su man robez na schouder di S. y man drechi na schouder di mama di S. Segun M., na dado momento S. a cuminsa mishi cu su man na parti intimo di M. M. a bisa Hues cu el a kita su man for schouder di e mama y a tene man di S. Na dado momento M. a saca su parti intimo y pone man di S. ariba dje. M. a cuminsa caricia S.
Na dado momento S. a dal M. na su bariga cu su elleboog. E ora ey M. a stop di mishi y a bay pa pone su parti intimo bek den carson. E ora ey S. a hala un banda y e amiga di ruman homber di S., a mira M. su parti intimo y a cuminsa henter un problema. Segun M., S. no a haci nada. E mama di S. a reclama M. kico el a haci cu su yiu. Nan a atak’e. E mama a dal M. un mokete mientras cu S. a cana bay.
NENGA DI A MISHI CU DAMA
Hues a bisa cu segun declaracion di S. na Polis, M. a pone man na su schouder y despues a baha na su heup. Despues el a sinti cu M. tabata caricia na su atras y hinca man bao su saya pa hala su panty. El a dal M. cu elleboog pa e stop. Despues M. kier a mishi na su parti intimo y S. a bolbe dal’e cu elleboog. Despues el a sinti M. ta pone su parti intimo na su lomba. E ora ey el a spanta, dal M. cu elleboog y bira. E momento ey e famia tambe a mira cu M. tabatin su parti intimo saca afor. Nan a bay reclama M. y S. a bay den auto. S. ta desmenti di a mishi cu e parti intimo di M.
M. a desmenti di a hisa saya di S. El a bisa Hues con e ta bay hisa e saya di S. sin ningun hende cu tabata para eynan no ripara. M. tambe a desmenti di a bay hala S. su panty un banda y tampoco cu su parti intimo tabata na S. su lomba. El a admiti di a pone S. su man riba su parti intimo. El a desmenti di a menaza S. y usa violencia.
CONDENA CABA PA ABUSO
Hues a bisa cu M. na 2018 a wordo condena pa abuso na 4 aña di prison. Tin raport di Reclasering cu ta mustra cu M. a wordo molestia. E mester di ayudo psycologico pa atende cu cosnan cu a pasa den pasado pa e laga los. Tambe e raport ta bisa cu M. mester haya tratamento pa usamento di alcohol. Reclasering ta haya cu M. mester guia di Reclasering.
NO KIER PAPIA CU PSYCOLOGO
Fiscal a puntra M. pakico e no a coopera pa haci evaluacion di psycologo. Segun M. den pasado caba a haya evaluacion y esey no a yuda. Fiscal a bisa cu esey tabata pa un otro caso. Fiscal a remarca cu den un periodo cortico, M. ta bolbe cay sera pa un otro caso caminda ta mishi cu un dama. Fiscal a mustra cu segun e raport di 2018, psycologo ta papia cu e chens pa M. ripiti e mesun cos ta medio. Reclasering ta haya cu M. no ta mira cu e ta responsabel. Fiscal ta haya cu M. no ta realiza cu tin algo cu no ta bon. El a bisa pakico M. no ta coopera cu investigacionnan pa mira con lo por yud’e. Fiscal a bisa cu e otro solucion lo ta cu mester duna castigo pisa.
FISCAL A BAHA PISA
Fiscal a bisa Hues cu M. ta bisa cu ta e muher S. a cuminsa mishi cun’e y e ora el a cuminsa tambe y saca su parti intimo. Otronan a mira esaki y e ta absolutamente inacceptable. Fiscal a bisa cu e no ta duda den e declaracion di e dama S.
Fiscal a bisa cu e ta parce un intento di violacion. Na opinion di Fiscal, e mishimento tabata bay den direccion di violacion. Mas ainda si mira cu M. tabata sera 4 aña pa un caso di abuso. Na opinion di Fiscal, e forzamento no necesariamente mester tin uso di forza. E por ta tambe formanan di mishi. Fiscal a sigui bisa cu e ta lamenta cu M. ta tuma un postura di no kier coopera pa laga sa kico ta pasando cun’e.
Fiscal ta haya cu mester proteha comunidad di M. Fiscal a puntra, kico lo a pasa si no tabatin mas hende presente. El a exigi 3 aña di prison pa M., di cual 1 aña ta condicional y un tempo di prueba di 3 aña. For di e castigo mester kita e tempo cu M. ta sera caba den KIA. Como condicion special, Fiscal a exigi pa durante e tempo di prueba, M. cay bou guia di Reclasering. Di e forma aki M. lo por haya tratamento pa uso di alcohol y tambe guia di psycologo.
Despues di a scucha defensa di abogado, Hues a bisa cu e ta sera tratamento di e caso y ta bay studia e caso. Hues a palabra cu dia 23 Juni 2023, e lo bisa e sentencia.