Pueblo di Aruba ta keda cordialmente invita pa e gran clausura di WE Aruba dia 9 y 10 di juni proximo
ORANJESTAD: Diasabra ultimo, a tuma luga competencia di Weganan Escolar den e disciplina di Beach Tennis di Categoria A y B di Mucha Muhe y Categoria A y B di Mucha Homber na Beach Tennis Aruba na Eagle.
Den e disciplina di Beach Tennis, Categoria A di Mucha Muhe, Ariesa y Eva di Conrado Coronel a conkista prome luga, Isabella y Lauren di Washington a sali na di dos luga y Roxienne y Aaliyah di Sagrado Curason a sali na di tres luga. Den Categoria B di Mucha Muhe, Dhaena y Kailey di Cacique Macuarima a sali na prome luga, Ciara y Katelyn di Mon Plaisir a sali na di dos luga y Amelia y Daniela Washington a keda na di tres luga.
Pa loke ta trata Categoria A di Mucha Homber den e disciplina di Beach Tennis, Ishem y Keon di Conrado Coronel a conkista prome luga, Arnold y Nishant di Cacique Macuarima, di dos luga y Matias y Ryand di Colegio San Hose di tres luga. Den Categoria B di Mucha Homber, Joshua y Jaydrick di Sagrado Curason a sali prome luga, Alexander y Sean di Conrado Coronel a sali na di dos luga y Brandon y Haguen di Sagrado Curason a keda na di tres luga.
Minister di Enseñansa y Deporte Endy Croes ta aplaudi e muchanan cu a destaca diasabra ultimo den e disciplina di Beach Tennis y ta desea tur scol cu ta competiendo den diferente disciplina durante e dianan binidero hopi exito. Ministerio di Enseñansa y Deporte hunto cu IBISA ta invita Pueblo di Aruba pa apoya nos mucha- y hobennan durante e competencianan di Weganan Escolar. Alabes, ta invita e comunidad di Aruba pa e clausura di Weganan Escolar, diabierna 9 di juni, cuminsando 5:30 di atardi na Joe Laveist Sport Park na San Nicolas, unda cu ta bay tin entregamento di premio pa e scolnan ganado. Diasabra, dia 10 di juni a gran Competencia di Baile Deportivo y Cultural ta tuma luga na Aruba Entertainment Center na Dakota, cuminsando 5:00 di atardi. Bin apoya nos streanan di mañan y disfruta di un gran presentacion di nos talentonan local.
