ORANJESTAD – Hof di Corte Superior, recien a dicta sentencia den e apelacion di e homber G.T. contra su sentencia di 5 aña di prison. Hof ta haya e castigo duna na su lugar.
ARUBA NATIVE por a compronde cu Hof ta haya e castigo di 5 aña di prison na su lugar y a confirma esaki.
TRAFICA DROGA PA MIAMI
Dia 8 di Juli 2022, Hues di Corte den Promer Instancia den su sentencia, a bisa cu G.T. pa añas tabata forma parti di un organizacion criminal cu tabata dedica na traficacion di droga. E dama J.K., kende a wordo gara na aeropuerto cu cantidad di bolita y cylinder cu droga den curpa, a duna declaracion mustrando cu ta pa G.T. e tabata hiba droga. Investigacion a mustra cu diferente biaha a transporta droga pa Miami. E dama J.K. a bisa cu el a haya for di G.T. un cantidad di cocaina y cylinder di cocaina y algo mas di 2000 florin como adelanto pa hiba e droga Miami. Tambe J.K. a bisa cu G.T. lo a bisa cu un otro ta bay cun’e. Segun J.K. esaki ta di 6 biaha cu el a hiba droga Miami.
APELA CASTIGO
Hues a mustra cu J.K. a admiti di a hiba droga pa G.T. Hues ta haya cu G.T. tabata fungi como intermediado pa doño di e droga (brother) y e mulanan. Hues ta haya legalmente proba cu entre Februari 2018 y October 2021 a exporta cocaina. Hues ta haya cu G.T. ta complice di traficacion y forma parti di un organizacion criminal. Fiscal a exigi 5 aña di prison y Hues a confirma e castigo. Pa cu castigo, Hues a tene cuenta cu pa añas G.T. tabata exporta cocaina pa haya placa. Na opinion di Hues, G.T. tabata forma parti di un organizacion criminal. Su funcion tabata pa regla mulanan y percura pa nan haya e droga pa hiba Miami. Hues a tuma na malo cu G.T. a haci esaki puramente pa placa. El a condena G.T. na 5 aña di prison.
G.T. a apela e sentencia y tres Hues di Corte Superior (Hof) a trata e caso, caminda Procurador General a pidi Hof pa confirma e 5 aña di prison.
SENTENCIA DI HOF
Hof den su sentencia ta mustra cu e dama J.K. a admiti di tabata hiba droga pa G.T. E dama J.K. a declara na e agentenan di droga cu G.T. tin un amigo cu ta bende droga cu hendenan na Miami. Dia 15 October 2021, J.K. a wordo gara na aeropuerto cu bolitanan di droga y cylinder cu droga den su curpa. Hof a sigui bisa cu na cas di S.R., riba 19 October 2021, a haya 539 pilder di XTC. S.R. a declara cu ta for di G.T. el a haya un caha cu e pildernan aden.
Hof, pa cu e castigo, ta mustra cu pa añas G.T. a forma parti di un organisacion criminal cu tabata concentra riba exporta cocaina pa Miami.
Hof ta haya cu e funcion di G.T. tabata, busca mulanan pa hiba e cocaina Miami. Na opinion di Hof, e funcion di G.T. den e organizacion criminal tabata importante. Hof ta haya cu G.T. no a tene cuenta cu e salud di e mulanan, mirando cu nan tabata hinca droga den nan curpa. Tambe Hof ta haya cu G.T. ta culpabel di hunto cu un otro, tabatin cantidad di pildernan XTC.
Na opinion di Hof, e cantidad di pildernan aki tabata pa bende. Hof ta haya cu mester caba cu e tipo di traficacion aki.
Hof a confirma e castigo di Corte den Promer Instancia. Hof a condena G.T. na 5 aña di prison, kitando e tempo cu e ta sera den KIA.