Oranjestad, Na ocasion di Dia Internacional di Derechonan di Mucha, Tienda di Educacion Aruba ta pone enfasis riba e gran importancia cu educacion y desaroyo tin den bida di tur mucha y hoben na nos isla.
E trabounan di Tienda di Educacion Aruba ta basa riba Articulo 18 di e Convencion di Derechonan di Mucha, cu ta subraya e derecho di cada mucha na educacion y desaroyo, y e responsabilidad di su mayor of voogd legal pa guia y proteha nan den esey. Tienda di Educacion Aruba su punto di operacion vocal ta basa riba articulo 18, di e derecho di mucha. E articulo ta pone enfasis riba e desaroyo y educacion di e muchanan y e responsabilidad di e mayor of voogd legal pa cu esaki. Tienda di Educacion ta sali for di e punto di bista (vision) cu cada mayor/educador tin e boluntad, habilidad y talento pa yega na solucionnan responsabel pa loke ta trata criansa di nan yiu(nan). Un palabra, un gesto of un actitud di interes sincero y positivo por tin un impacto profundo riba bienestar y desaroyo di nos muchanan y hoben, riba e manera con nan ta sinti nan mes, y wak nan futuro.
E dia internacional aki ta un oportunidad pa reflexiona y recorda con importante e rol di un mayor/educador ta, pero tambe pa enfatisa cu como comunidad henter, nos tin e responsabilidad pa traha hunto pa crea un ambiente pedagogicamente sigur, saludable y stimulante. Solamente asina, cada mucha y hoben por crece y florece den bienestar di su mes y di e comunidad rond di dje.
Ora nos ta pensa riba derechonan di mucha, hopi tema ta surgi: educacion, pobresa, discriminacion y aceptacion, emigracion, salud mental, sosten, ayudo social, derecho penal hubenil, abuso di mucha, traficacion di mucha y participacion civico-social.
Entre e temanan aki, educacion ta keda un di e puntonan principal y cardinal. Nos ta boga continuamente pa un sistema educativo cu ta flexibel y adaptabel na e necesidadnan y realidad di e generacion di awor. Un scol pedagogicamente saludable ta un espacio unda muchanan por desaroya no solamente academicamente, pero tambe den nan abilidadnan social-emocional, sin importa nan diferencianan of limitacionnan. Un sistema educativo cu ta adapta segun e realidad di e mucha ta esencial pa prepara nan pa bida diario y pa e futuro, cu sigur tin un impacto positivo riba nan bienestar y e desicionnan cu nan ta tuma den nan propio caminda di crecemento.
Proteccion di derechonan di mucha no ta solamente un tarea di gobierno, sino di nos tur como comunidad. Scol, hogar, organisacionnan social y sector priva mester uni forsa pa crea un Aruba sigur, inclusivo, stimulante y motivante pa cada mucha y hoben na Aruba.
“Tras di cada mucha of hoben cu ta kere den su mes, tin un mayor of educador cu a kere den dje prome.”
– Romely Flanegin, Directora Tienda di Educacion Aruba
