ORANJESTAD – “Mi kier gradici y duna elogio na e ekipo di profesionalnan di Directie Financien, Departamento di Impuesto, Directie Wetgeving en Juridische Zaken, y Algemene Rekenkamer pa nan trabou incansabel riba e cuenta anual di 2019. E trabou tabata uno grandi, y pa motibo di falta di personal, cambio den e sistematica y falta di personal cualifica, a causa un retraso. Asina mes, esnan cu si tabata tey a haci un trabou tremendo”, Evelyn Wever-Croes, lider di fraccion di MEP a duna di conoce.
Wever-Croes a reconoce cu e cuenta anual 2019 ta laat. El a splica cu tabatin obstaculonan cu a causa e atraso pero cu a enfrenta tur esakinan, y awe ta cuminsa mira e resultadonan. E atraso aki ta un consecuencia di añanan largo di desorden financiero, di falta di disciplina y di responsabilidad financiero durante e dos gabinetenan di Mike Eman 1 y 2. Esaki ta un realidad historico cu no por wordo ‘deleted’”.
Segun e lider di fraccion e cuenta anual di 2019 ta e prome aña di e orden financiero cu su gabinete a implementa despues di e acuerdo cu a logra na november 2018 cu Hulanda. Un acuerdo cu tabata necesario pasobra gabinete Mike Eman a viola tur palabracion cu Hulanda.
E ley di cuenta anual 2019, ta marca algun conclusion importante di e maneho financiero di Gabinete Wever-Croes:
1. Un Mehoramento Fuerte den Resultado di Explotacion / exploitatie resultaat, deficit y surplus. Di deficitnan te cu 400 miyon florin, pa un surplus di 40 miyon.
2. Entradanan di pais Aruba a aumenta, debi na un maneho di impuesto mas husto, den cual mas hende ta paga.
3. Gastonan di gobierno ta bou control
4. Debe nacional a cuminsa baha
5. Cumplimento cu normanan internacional
“Pueblo di Aruba ta merece transparencia, e pueblo merece un gobierno cu ta responde. Mi ta sinti hopi orguyoso cu finalmente nos ta eliminando e retraso den aprobacion di cuentanan anual. E no tabata facil. Pero el’a wordo haci si. Nos no por cambia pasado, pero nos por dicidi pa nunca mas bolbe na desorden di antes. Aruba ta moviendo padilanti y ta birando fuerte. Y hunto, nos a logra esaki. Danki un biaha mas na tur cu a haci esaki posibel”, Evelyn Wever-Croes a expresa.
