NOORD — Aruba ta reuni pa celebra e temporada di Pasco di forma alegre y autentico cu un evento grandi pa tur comunidad: PARANDA NORTERO, un mercado di Pasco den un anochi dedica na tradicionan arubiano, talento local, gastronomia multicultural y ambiente familiar cu ta caracteristica di nos pueblo. PARANDA NORTERO lo tuma luga 29 di November 2025, di 6:30 PM te 11:00 PM, cu entrada completamente gratuito pa grandi y chikito.
E evento special aki ta parte di e movimiento “Noord Celebrando Hunto”, un iniciativa pa uni bario, famia, amigonan y bishitante den un ambiente yena di ambiente celebrativo di fin di aña. Tur hende ta invita pa sali for di cas, drenta e ambiente di union y disfruta di un atmosfera di tradicion y presentacionnan cultural unico.
Un di e atraccionnan principal di e evento ta cu lo lansa e spotlight riba atistanan local, cu lo yega pa mustra talento y pasion riba escenario. Den un combinacion vibrante di musica, baile y ambiente tipico Arubiano, e programacion ta inclui presentacion di Gruponan di Baile, e ritmo contagioso di Tipico Briyante, energia cultural di Grupo di Betico, y naturalmente e sonido tipico y tradicional cu e pueblo ta spera durante temporada di Pasco: Gaiteros del Norte.
E mercado di Pasco mes lo keda un atraccion grandi. Ta spera platonan multicultural cu henter pueblo por gusta: delicia local, snack crioyo, gastronomia di diferente cultura cu ta forma parti di nos isla, y mucho mas. Talento artesanal lo tin su lugar tambe, cu hende por cumpra obranan creativo, regalonan tradicional y producto traha na man perfecto pa temporada di fiesta.
Meta principal di Paranda Nortero ta pa “promove union den comunidad, crea un espacio segun y alegre pa tur famia, y mantene biba e tradicionan di Pasco Arubiano cu ta pasa di generacion pa generacion.” Den un tempo caminda ritmo di bida ta bai lihe y conexion humano ta sinti falta, e evento aki ta busca pa trece bek e sentimiento di bario, alegria y celebracion colectivo.
Ademas, e evento ta diseña pa atrae hende di tur edad. Pa e mas chikito tin sorpresa y actividad den Mercado di Pasco, mientras cu adulto por disfruta di musica, cuminda y un ambiente relahante di e anochecer Arubiano. Pa esnan cu ta di bishita riba nos isla, ta un oportunidad perfecto pa sinti di cerca e spiritu cultural cu Aruba ta orguyoso di comparti.
“Paranda Nortero” su mercado di Pasco ta prominti di bira un di e evento mas popular di e temporada, un anochi unda ambiente Arubiano, sabor multicultural y amor pa comunidad ta uni den un celebracion familiar.
29 di November 2025 – Save the Date! 6:30 PM – 11:00 PM – tuma bo lugar.
Entrada ta GRATIS – un motibo mas pa no perde! Pa mas informacion, contacto Centro di Bario Noord via tel. 568-2935.
