Home » Algun atraco arma cu yega di pasa antes na Aruba, riba Banco, Esso Station y Drive Inn

Algun atraco arma cu yega di pasa antes na Aruba, riba Banco, Esso Station y Drive Inn

by Admin
0 comment 140 views

HISTORIA DI ARUBA: Crimen na Aruba, algun atraco di pasado

Atraco no ta un crimen di ultimo tempo, atraco arma ta un crimen cu ta pasando ya for di hopi tempo caba na Aruba. 

Prome cu 1980 Aruba a conoce varios atraco arma caba algun cu lo a keda soluciona y otro cu aparentemente nunca lo a wordo soluciona.

Un cu a hala nos atencion tabata di un homber Hulandes cu a atraca CMB y a bay cu mas o menos 120 mil florin.  Un cu pa nos tabata haya hopi peculiar tabata e atraco riba e tempo ey Esso Station na Santa Cruz, unda cu atracadornan lo a los un of dos tiro y un di e atracadornan a hunta su cara manera Zwarte Piet.

E atraconan di awendia y di antes no a cambia mucho, e mesun modus operandi, drenta cara tapa, menasa cu arma y baha na awa cu e placa cu tin den caha.

Atraco riba sucursal di CMB na Plaza Shopping Center

Dialuna 27 di september 1978, un atraco arma  a tuma lugar na un sucursal di Caribbean Mercantile Bank den Plaza Shopping Center. Plaza Shopping Center tabata situa antes unda actualmente ta Royal Plaza Mall.

E atraco aki a tuma lugar den careda di 12’or y mey di merdia. Un homber Hulandes un poco flaco a drenta den e banco, e homber  a pidi e personal di e banco pa traha un cheque pa su persona, e trahador a bise cu pa trahamento di cheque e mester acudi na e oficina principal den e tempo ey CMB Nassaustraat, actualmente Caya Betico Croes.

Esaki no a cay den bon tera cerca e homber Hulandes aki, mesora ela saca un revolver y a punt’e riba e personal di banco. E momento ey tabata tin tres empleado den e banco. E homber a puntranan pa e baño, pero ora ela ripara cu tin un gang den e banco, ela manda tur tres empleado den e gang y a ceranan eyden.

No ta conoci si tabata tin mas persona envolvi den e atraco aki, pero fiesta a wordo haci cu e cahanan den banco. E homber Hulandes a baha na awa cu un tas cu mas o menos 120 mil florin. Polisnan mesora a actua, nan a cuminsa cu un buskeda , tambe nan a pone  extra control na airport y na waf, pero asina mes tabata wordo bisa cu e homber Hulandes aki lo a logra bandona Aruba via lama.

Atraconan na Maart 1977 ABN Bank y na Esso Station Santa Cruz

Na maart 1977 tambe a tuma lugar un atraco arma riba ABN Bank su sucursal na Sta Cruz den e atraco aki e atracadornan a baha na awa cu 80 mil florin, y despues di esaki e Esso Station na Santa Cruz a bira e siguiente victima.

Despues di e atraco riba ABN su sucursal na Santa Cruz a tuma lugar un otro atraco arma atrobe na Santa Cruz, e biaha aki riba e Esso Station, unda actualmente ta Citgo Santa Cruz. Algo prome cu 10’or di anochi, net prome cu e gasstation tabata bay cera, un auto di marca Toyota, color geel a yega para y un homber pura pura a baha for di e auto aki, e tabata bistiendo un meya (panty hose) riba su cabes y den su man e tabata tin un revolver.

Ela cana bay na e cahero y a pidi e cahero e placa, e cahero  cu ainda no a realisa cu ta un atraco, a puntr’e kiko ta pasando, e atracador nervioso a kere cu ta un otro intencion e cahero lo tabata tin a los un tiro. Na momento cu e atracador a tira, e otro atracador cu tabata sinta den e auto a spanta y mesora a baha pa bay mira kiko tabata pasando. E atracador aki tabata tin su cara pinta manera Zwarte Piet. E cahero pa evita lo peor a dunanan e benta.

Mientrastanto un trahador di e Esso Station cu tabata cerando e pompnan tabata mira tur loke tabata pasando y na momento cu e atracadornan tabata bandonando e sitio, ela core na pia tras di e auto, a mand’e auto cu piedra pero esaki no a yuda cu net nada. E trahador a logra coi e number di auto, e number tabata A 16095, pero e plaachi di number tabata traha di carton y dimes e no tabata cuadra cu e auto. E atracadornan aki a logra baha na awa cu entre 1500 y 2 mil florin.

Atraco riba dos empleado di Drive Inn Theater

Diaranson 13 di September 1978, den careda di 11’or di anochi, e dos empleada di Drive Inn a wordo atraca y e atracadornan a bay cu e benta y e auto di un di e empleadanan. E atracadornan a logra bay cu mas o menos 2 mil florin.

Foto Archivo Drive Inn Theater Aruba

Manera ta custumber despues di e funcion, dos empleada lo ta cera y ta bay cu e benta di dia. Tabata trata di dos señorita un Boekhoudt y e otro Celaire. Despues cu nan caba di traha nan ta bay hunto cas den auto. Un di e empleadanan tabata sinta caba den auto ( un Volkswagen) y tabata wardando riba e otro empleada pa e subi den auto pa nan bay. Na momento cu esun a bay habri e porta pa subi den auto, pa nan por bay, nan a wordo sorpresa pa dos persona cu cara tapa cu un paña berde. E dama tras di stuur a spanta, pero no kier a ranca bay y laga su colega su so atras, cu na e momento ey ainda no a subi den e auto.

E atracadornan a menasa e dos damanan aki cu un cuchiu y a baha e empleada cu tabata sinta tras di stuur for di su auto y ambos atracador a baha na awa cu e auto y cu e benta di dia di Drive Inn cu tabata den careda di 2 mil florin.

Mesora nan a informa polis di e atraco aki y polis a cuminsa cu un buskeda despues di basta rato buscando polis a bin topa cu e auto di e empleada den Rooi Frances, pero e benta di dia di Drive Inn cu tabata den e auto si a desaparece.

Tambe tabata tin un informacion circulando cu algun aña prome a tuma lugar un atraco arma tambe riba D.O.W. y cu e atracadornan a baha na awa cu 80 mil florin y tambe  cu e atraco aki nunca lo a keda soluciona.

Aruba a conoce varios atraco den añanan 70, 80,90 bay ariba. Atraconan cu a marca historia, atraconan cu a keda soluciona, tin cu nunca mas a wordo soluciona, atraconan cu a caba fatal, ta hopi atraco Aruba a conoce, pero nos a prefera di pone e atraconan aki cu sigur no ta tur hende ta na altura di nan of ta cordanan mes.

Ken por a biba pensa cu na 1978 un homber Hulandes a yega di atraca un banco na Aruba y cu e no lo a wordo gara.

E atraconan aki ta djes un tiki di tur cu a yega di pasa na Aruba.

Fuente: Prome 

 

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio