Historia di Aruba: E biaha aki nos lo dedica un historia di Aruba na un aña di La Reina cu su fiesta a caba na un tragedia. No ta tur hende awendia ta corda of ta na altura con Aruba antes tabata celebra e cumpleaños di La Reina. Especialmente e temporada di Reina Juliana dfm. E tabata wordo celebra en grandi, cu actividadnan for di oranan di mainta trempan y te den oranan laat di atardi.
Ken ta corda e hisamento di flie, balanciamento di auto, subi pal’i ceba, bringamento cu cusinchi, coremento den saco y e baile di cinta. Esakinan tabata algun di e actividadnan cu tabata wordo teni durante e dia aki.
E celebracion tabata den tur bario. Sin lubida e cushina y bar cu den tur bario tabata bon surti. Riba e dia aki hopi hende tabata sali bay participa of bishita e eventonan den nos barionan. Algo cu sigur cu hopi cu ta riba 50 aña di edad mester ta corda bon. Dia 30 di april tabata un dushi dia pa famianan sali y goza di nan dia di fiesta.
Coba Lodo: Dialuna, 30 di April 1967, dia di La Reina, manera den tur bario, e bario di Coba Lodo riba e veld di Arsenal tambe tabata tin un celebracion grandi. Un cantidad di hende no solamente di e bario, pero tambe di tur otro bario tabata pasa bishita e veld di Arsenal.
Tabata den careda di 6:15 pm di atardi, cu un Carioca a subi riba veld unda ainda lo tabata tin basta hende na e celebracion di aña di la Reina. Segun nos a compronde cu e chauffeur di e Carioca lo tabata bou influencia y lo tabata forma peliger pa e personanan riba e veld. Segun polis di e tempo ey, un of mas persona den e multitud a bati alarma, pa motibo cu e chauffeur tabata core na un forma irresponsabel banda y tambe memey di e publico, cual tabata forma un peliger pa tur persona cu tabata para riba e veld e momento ey.
Dos polis yiu di Corsou, pero e tempo ey trahando na Aruba, a wordo manda na e asistencia aki. Na yegada enberdad e agentenan policial a topa cu e Carioca riba e caminda banda di e veld. Mesora nan a acerca e chauffeur, e homber tabata hole di leu alcohol. E polisnan a pidi e chauffeur pa dunanan e yabi. E chauffeur a nenga rotundamente di polis e yabi di e Carioca. Polis cu poco esfuerso a logra kita e yabi for di e chauffeur y tambe a pidi e chauffeur pa bay cu nan Warda di Polis pa haci un test di alcohol.
Esaki no a cay den bon tera cerca algun homber cu tabata sinta den e Carioca, e hombernan aki a cuminsa instiga algun persona mas cu tabata den e publico y nan tur a cuminsa grita polis “cu esaki si nos no ta acepta”. E grupo aki a baha riba e polisnan y a pushanan contra un trankera.
Despues nan a benta un di e agentenan policial abou, mesora e otro agente a exigi pa e grupo no yega mas cerca y pa nan hala mas patras. Ora e la ripara cu esaki no tabata sosodiendo, e la los un tiro di advertencia den halto. E grupo aki no a perde pa gana y nan a bay trata na kita e pistol for di e polis. Durante cu algun di e hombernan tabata luchando pa kita e pistol for di e agente policial, varios tiro a cay, cu consecuencia cu 4 homber a wordo alcansa pa e tironan aki. Mientrastanto refuerso di polis a yega, pero lastimamente ya e daño tabata haci.
Tres di e hombernan aki tabata di fam Ras y un tabata di fam Croes. E homber di fam. Croes cu a keda herida door di un di e balanan perdi, no tabata tin nada di haber cu e bringamento cu polis. Croes tabata cu su yiu muhe chikito den brasa gosando di e actividadnan riba e veld na momento cu e la wordo alcansa pa e tiro na e parti ariba di su pia.
Lamentabelmente un di e otro tresnan di fam Ras, a keda gravemente herida y a fayece na yegada na San Pedro Hospital. E otro dosnan y Croes tambe a wordo transporta pa hospital. Na yegada na San Pedro Hospital mesora e heridonan a drenta den camber di operacion.
Un testigo a conta nos cu e tabata para na Tonka Store, cu ta keda riba e caminda pazuid di e Veld di Arsenal y e la mira e bringamento aki, tambe e la conta nos cu e hombernan tabata tin curashi y hopi rabia den nan curpa cu nan a carga cadushi cu man pa dal polis.
E agentenan policial cu na prome instante a wordo pusha contra e trankera a keda herida cu basta hinka di sumpiñanan di cadushi na diferente parti di nan curpa y un herida na pols.
E grupo cu a ocasiona e bringamento despues di a nota kiko tur nan a caba di ocasiona a keda spanta y tristo. Polis a logra domina e grupo inquieto aki.
Den oranan di anochi por a nota den vecindario di hospital y Warda di Polis aglomeracionnan di hende cu tabata busca pa haya mas informacion di locual a sosode, te den oranan laat e sucedido riba veld di Arsenal tabata e topico prinicipal di combersacion.
E carioca a wordo tuma den beslag y durante investigacion, polis a bin topa cu 7 boter di rom bashi den e Carioca. E informacion aki a wordo duna door di e Inspecteur di e tempo ey Mr. De Wijs, na prensa.
Den añanan 60 pa 70, e tempo ey, Aruba tabata forma parti di Antiyas Hulandes y tabata biba manera un friccion entre Arubianonan y yiunan di Corsou. E Arubianonan tabata rabia cu locual tabata pasando, caminda Aruba no tabata tin mucho of casi nada di bisa den e gobierno Antiyas. E gobierno tabata manda agentenan policial for di Corsou bin traha na Aruba y no tabata tuma asina facil Arubianonan pa bira polis, esaki a crea manera un rabia bou di e pueblo di Aruba y nan tabata mir’e como un inhusticia.
Te hasta politiconan di Aruba a manda via telegram pa Gobierno di Antiyas haci algo cu e situacion aki, te a sugeri pa kita arma for di polisnan cu tabata bin di traha na Aruba. E caso aki a causa un consternacion hopi grandi na Aruba, na Antiyas y te hasta a sali den noticia na Hulanda.
Un dia di Celebracion cu un fin tristo.