Recordando algun suseso cu a pasa na Aruba riba 5 di januari.
05 januari 1973: Polis mester a baha un homber, 3’or di marduga riba dak di un edificio
Diabierna 05 januari 1973, presencia di polis a wordo pidi pa un homber desconoci riba dak di un edificio den Oranjestad. Na yegada polis a baha e homber for di riba e dak. Ora polis a puntr’e kiko e ta haci den e oranan di Dios riba e dak di e edificio, e conta polis cu ora e la bay schop un cacho, su sapato a sali for di su pia y a bay cay riba e dak. E no por a yega cas sin su sapato y mester a subi riba e dak pa coy su sapato pa e por cana bay cas. Despues cu polis a papia cu a homber a lag’e bay.
05 januari 1976: Dos trahado deteni pa horta placa for di safe na Americana Hotel
Na Americana Hotel, polis a detene dos trahador cu tabata horta placa for di safenan. Den e ultimo lunanan e hotel tabata ripara cu varios biaha un cantidad di placa tabata desaparece for di e safenan. E cantidad di placa cu a desaparece tabata mas cu 10 mil dollar. E ladronicia aki a wordo poni den man di autoridad y hopi lihe polis a pone man riba dos trahado y cual mesora un a admiti di a coy e placa .
05 januari 1980: Arma di candela scondi den potchi W.C. den baño publico na airport
Un werkster na Reina Beatrix Airport a durante cu e tabata haciendo e bañonan publico limpi, ela nota cu e awa ora e flush W.C. no tabata bay. Ela mira mas abou den e tubo un algo preto tabata stroba e awa di bay. Ora el a bay sak’e, ela ripara cu ta un arma di candela ta scondi den e W.C. E la saca e arma di marca Walter di 9 mm, cu tabata carga cu 6 patronchi. E arma a wordo entrega den man di e Chef di Bewakingsdienst di airport, kende a entreg’e den man di recherche pa mas investigacion.
05 januari 1981: Joyas na balor di 108 mil florin horta for di e Joyeria “Charlie van Eer”
Dia 5 di januari 1981, presencia di polis a wordo pidi na e Joyeria “Charlie Van Eer” ubica na Waterweg 3A.
Ladronnan a bay cu un cantidad di holoshi di man di oro, renchi di dede di oro y varios armband na un balor di 108 mil florin. Mesora a cuminsa cu un investigacion. Riba 7 di Januari 1981 polsi a logra pone man riba dos homber R.B. di 23 aña y C.Q. di 55 aña. R.B. a admiti cu hunto cu dos amigo mas nan a comete e ladronicia aki y tabata kier a hiba e joyasnan den exterior. E dos hombernan aki tabata cla pa subi avion pa bay Medellin Colombia, na momento cu autoridad a pone man riba nan. Despues polis a detene dos otro persona di 19 aña, J.T. y R.B. Tambe C.Q. a keda deteni pa heling pa motibo cu ela cumpra un parti di e joyasnan y a yuda warda e joyasnan.
J.T. a keda deteni na su cas y e la hiba recherche unda den nan a warda e Joyasnan. Nan tabata warda den un mondi banda di e casnan di pueblo na Tarabana, den saco di papel autoridad a haya e resto di joyasnan. Tur e joyasnan horta a wordo haya bek y entrega na e joyeria.