ORANJESTAD, 18 di november 2025 – Minister di Relacionnan den Reino, Educacion, Hubentud, Inovacion y Deporte, mr. Gerlien Croes, a firma un acuerdo di colaboracion (MoU) cu Monroe University na New Rochelle, New York, pa crea mas oportunidad pa nos hobennan sigui nan estudio na un institucion internacional di nivel.
E acuerdo ta habri porta pa studiantenan Arubano den diferente area di estudio, particularmente den deporte y programa di atleta-studiante, musica, arte, STEM (Science, Technology, Engineering & Mathematics) y otro programa di intercambio y colaboracion academico.
E aliansa ta parti di un bista amplio pa crea oportunidad educativo pa futuro, amplia acceso na institucionnan di enseñansa superior, y fortalece laso educativo entre Aruba y Merca.
Minister Gerlien Croes a expresa su satisfaccion cu e paso nobo aki:
“Nos ta sigui amplia horizonte pa nos hobennan. E meta ta pa duna mas alternativa pa forma nan talento y prepara nan pa un mundo global. Enseñansa y oportunidad ta e base pa progreso sostenibel di nos pais”.
E acuerdo cu Monroe University ta e di tres acuerdo internacional cu Minister Gerlien Croes a firma den un periodo cortico, cu ta refleha su compromiso pa fortalece educacion y innovacion na Aruba. No ta descarta cu Minister Gerlien Croes hunto cu su minister lo ta trahando duro pa yega na mas acuerdo y colaboracionnan educativo den futuro.
