ORANJESTAD – Recien Corte di Husticia a dicta sentencia den e caso penal cu Ministerio Publico a cuminsa contra e muher Venezolano Y.M., e hombernan Venezolano A.M.D., H.M., J.S.D.
E acusacion contra e grupo aki ta cu entre 26 April 2022 y 1 Mei 2022 a importa casi 28.9 kilo di marihuana. Ademas ta acusa e hombernan di tabatin arma di candela den posecion.
LOTE DI DROGA HAYA DEN DOS CAS
Hues, via video conference, a mustra cu e grupo ta famia di otro. E señora Y.M. desde 1979 ta biba na Aruba. Hues a bisa cu segun e relato di Polis, dia 2 Mei 2022 a base di informacion, Polis a haci investigacion na 2 cas na Hooiberg. Na Hooiberg 47 C. unda J.S.D. ta keda, a haya 41 pakinan di marihuana. Nan a pisa algo mas di 21 Kilo. A haya den un lachi di cashi un arma di candela.
Na Meiveld den un apartamento, Polis a haya den plafond un tas cu 13 paki di marihuana cu a pisa algo mas di 6 kilo.
E señora Y.M. a bisa Polis cu e tabata sa cu su yiu y sobrino ta bin cu droga y lo haya 8 mil florin pa esaki. A.M.D. y H.M. a yega 26 April 2022 Aruba na forma clandestino cu e droga y J.S.D. a busca nan y hiba nan su apartamento. A.M.D. y H.M. tambe a bisa cu e droga tabata di nan y J.S.D. y nan tres a cumpra e droga y arma di candela. A.M.D. a bisa cu el a duna su mama Y.M. e tas cu marihuana pa warda. Hues ta haya cu tin pruebanan di sosten. El a bisa cu e no ta kere J.S.D. kende ta desmenti di ta envolvi den e importacion di marihuana.
Hues a bisa cu e ta haya e grupo culpable di importacion di marihuana y posecion di arma di candela. Esakinan ta delitonan serio.
Hues a bisa cu ta conoci cu droga ta malo pa salud di hende y cu droga ta causa adiccion. E posecion di arma ta causa peliger pa comunidad y ta crea sentimento di inseguridad.
Hues a sigui bisa cu esun cu tin un arma, ta dispuesto pa use cu tur consecuencia cu esaki por tin. Hues a remarca cu e grupo a pensa solamente den e placa cu nan ta gana y no con e droga ta perhudica famianan. El a tuma nan na malo ya cu nan ta extranhero.
CASTIGO
Pa cu e castigo, Hues a tene cuenta cu nan ta “first offender”. El a tene cuenta cu pa arma di candela den lachi tin castigo di 9 luna di prison y pa e lote di marihuana 33 luna di prison.
Hues a bisa cu e marihuana y arma lo wordo destrui. El a bisa cu Fiscal a exigi 40 luna di prison pa e trio y 24 luna di prison pa Y.M. El a confirma e exigencia. Hues a condena e trio A.M.D., H.M. y J.S.D. na 40 luna di prison y pa e dama Y.M. 24 luna di prison.