Den Haag, 20 november 2022 – Na teatro Diligentia na Den Haag a tuma lugar diasabra 19 di november e celebracion di 25 aña di existencia di Genootschap Nederland Aruba (GNA). E encuentro special aki a conta cu presencia di Princesa Beatrix. Na su yegada Princesa Beatrix a wordo ricibi pa e Comisario di Rey pa Zuid Holland Jaap Smit y burgemeester interino di Den Haag Mariëlle Vavier. Elja Raven a entrega un boeket di flor na e princesa na unda despues e e princesa a wordo ricibi pa presidente di GNA Nico van Grieken y director di Teatro Diligentia Lucien Kembel.
Na comienso di e programma – prome cu yegada di Princesa Beatrix – presidente di GNA Nico van Grieken a tene un introduccion den cual ela para keto na e origen di GNA y e meta di e Genootschap cu ta pa fortifica e lasonan entre Hulanda y Aruba y tambe crea mas concientisacion na Hulanda pa pais Aruba. Esaki pa 25 aña caba a keda treci pa medio di encuentronan cu ordadornan renombra. Sr. Van Grieken a bisa cu e tema di e celebracion aki ta “De kracht van verbondenheid, het Koninkrijk en Aruba in de toekomst” (E forza di relacion, y futuro di Reino Hulandes y Aruba) y e aspecto aki lo refleha tambe den e charlanan durante di e programma.
E prome orador tabata prof. dr. Viola Heutger, rector di Universidad di Aruba. Den su discruso prof. Heutger a papia riba posibilidadnan di estudio avansa na Aruba y cu e ta mira akinan potencial grandi mirando cu investigacion y cifranan a mustra cu e cantidad di studiante Arubiano cu ta sigi un estudio na nivel di HBO of Universidad na Hulanda y cu ta termina nan estudio cu exito ta hopi chikito den comparacion cu studiantenan cu a studia na Aruba. Pesey prof. Heutger ta boga pa mas cooperacion y intercambio riba tereno di enseñansa den Reino Hulandes pa asina crea mas opcion banda di studia na Hulanda.
Francoi Guadeloupe, docente antropologia na Universidad di Amsterdam den su discurso a boga pa un mentalidad comun den Reino pa loke ta trata e tema di ecologia. Laga e habitantenan di St. Maarten cera conoci cu e desaster di teremoto na Groningen y siña e habitantenan di Groningen e consequencia di orcannan cu ta pasa na e islanan ariba. Tambe sr. Guadeloupe a tene un analisis antropologico di e pueblo di e paisnan Caribense den Reino, tanto e aspecto di identidad, cultura, idioma y clase social, principalmente e evolucion cu e islana a conoci pa medio di migracion.
Por ultimo prof. Gert Oostindie, cu ta specialisa den historia di post colonial di Hulanda y di Caribe, a hiba un charla cu e titulo “Aruba en het ongemak in de Koninkrijksrelaties” ( Aruba y e incomodo pa cu e relacion den Reino), cu ta basa leve riba e buki “Ongemak” cu Oostindie recientemente a saca hunto cu Wouter Veenendaal. Mescos cu den e buki prof. Oostindie a papia riba e falta di comprencion y con por reduce esaki. Hopi di e informacion aki ta basa riba investigacionnan di hopi aña y dirigi ariba comprencion na ambos banda di oceano. Temanan cu a bin dilanti tabata e historia colonial, e proceso di decolonisacion, e situacion actual y un bista riba futuro. Pa loke ta futuro prof. Oostindie a bisa cu mester bin un ampliacion di e agenda di Reino Hulandes: clima y medio ambiente; enseñansa, salubridad y migracion. Stimula conocemento di e islanan na Hulanda y traha na cooperacion pa asina logra mas ampliacion.
E programa a conta tambe cu un parti cultural na unda e invitadonan a wordo encontra cu musica di cai di orgel den e foyer di teatro Diligentia. Riba e podium e poeta Arubiano Frida Winklaar Domacassé a declama poesia propio na unda tambe un poesia special scirbi pa e aniversario di GNA. E gitarista Jean Jacques Rojer a deleita e publico cu musica riba guitara.
Na final di e programa e burgemeester interino di Den Haag a sorpresa presidente di GNA sr. Nico van Grieken cu un decoracion real “Ridder in de Orde van Oranje Nassau” pa entre otro su trabao pa GNA.
Directiva di Genootschap Nederland Aruba por mira bek riba un exitoso celebracion di nan 25 aña di existencia y pa medio di charlanan sumamente interesante un biaha mas a demostra su compromiso pa fortifica e lasonan entre Hulanda y Aruba.
Publicacion di e potretnan ta unicamente posibel cu mencion di e nomber di e fotografo Nico van der Ven
Pa mas informacion: Sidney E. Kock