L.G.Smith Boulevard - Diasabra atardi 4'or empleadonan di un salon di beyesa situa den un mall ariba Smith Boulevard a haya e susto di nan bida.
Polisnan a sali cu urgencia direccion e negoshi aki, pa un auto cu a drenta den e luga.
Na yegada polisnan a bin topa un Honda Fit color blauw scur den e kapsalon.
Ta mustra cu e vehiculo lo tawata den e parkeerplaats eynan mes y pa un of otro motibo na luga di reverse a bay dilanti cu velocidad halto drenta e luga. E chauffeur no tawata tin rijbewijs tampoco.
Polis di trafico tambe a wordo pidi pa atende e caso aki, debi cu e chauffeur no tin rijbewijs.
Dos persona lo a wordo herida levemente, pero nada di gravedad. Polis toch a pidi pa un ambulance, unda cu na yegada e Paramediconan a bay paden y papia un rato cu nan. Niun persona a wordo transporta pa Hospitaal.
