Home » Exitoso Student-Recruiting Seminar na Universidad di Aruba, presenta pa Aruba North Little League den colaboracion cu Sr. Andrew Bartman 

Exitoso Student-Recruiting Seminar na Universidad di Aruba, presenta pa Aruba North Little League den colaboracion cu Sr. Andrew Bartman 

by Admin
0 comment 125 views

 

 

Un sesion educativo specialmente pa studiantenan y mayornan.

 

Ariba diasabra dia 3 di december na Universidad di Aruba a tuma lugar e sesion titula: “College Baseball Recruiting – The Facts” pa 10:30 di mainta dedica specificamente na studiante-atletanan cu tin e meta pa sigui nan estudio y hunga baseball na Merca y nan mayornan.  

 

Sr. Andrew Bartman tawata e orador principal informando y educando e mayornan ariba diferente punto cu un famia mester tene na cuenta si kier yega e nivel aki. Ela enfoca ariba tres aspecto specifico cual ta: Talento, Cifranan y Character. Ela enfatisa cu tur tres di e elementonan aki ta mesun importante, talento ta forma solamente un tercera parti. E cifranan di school lo determina e cantidad di ayudo financiero cu un atleta por ricibi pa su estudio rebahando e gastonan y bo character, ta locual lo lagabo sobresali riba un otro cu tin mesun nivel di talento y cifra.

 

Ariba e punto di talento, Sr. Bartman a comparti cu como un ex-college coach e kier wak estadistica di e hungador, incluso velocidad (tiramento), coremento, enfocando ariba e cinco (5) tools nan tradicional, pero tambe explora e tipo di data nobo. Coachnan kier wak diferente tipo di video entre otro highlights, workouts, showcases y di wega. Ademas mester tene cuenta cu e temporada cu un atleta por aserca un coach y vice versa. E ta recomenda pa usa google pa buska informacion di calendario pa cada nivel (NCAA, NAIA, NJCAA). Sr. Bartman ta splica cu un coach lo ricibi miles di email pa siman, y ta pesey mester sigui ta persistente den manda email y tuma contact. Traha bo lista y follow-up cada dos siman mas o menos te dia bo ricibi un contesta sea positivo of negativo.

 

Siguientemente ela enfoca ariba e cifranan cu un studiante ta ricibi na school, ela identifica varios “red flags” cu nan como coach lo por cai ariba dje. Entre otro si un studiante su GPA (Grade Point Average) ta abou, pero su testnan ACT/SAT ta halto ta indica cu e studiante tin e capacidad y inteligencia pa studia, pero e no ta hasi su esfuerzo maximo. E ta enfatisa cu un studiante-atleta cu e trese riba su team mester ta un hende cu e por confia riba dje pa hasi su best, riba veld y den klas continuamente. Teniendo na cuenta cu nan ta ricibi fondo pa solamente 11.7 hungador di baseball na un college y ta inverti den e mihornan ehora. 

 

E di tres punto cu Sr. Bartman a elabora riba dje ta e character di un hungador, bisando cu pa coach un hungador su character ta dificil, sea bon of malo. Tambe e ta bisa pa semper ta honesto den informa coachnan di bo cifranan, velocidad, etc. Pasobra una bes nan determina cu locual cu e hungador, mayor of coach no ta berdad nan lo corta comunicacion. Hungadornan mester compronde con importante character ta den e proceso, riba veld y pafor di veld. Ariba e topico aki ela dirigi su mes tambe na e mayornan tambe cu por causa cu un atleta no ta ricibi un lugar riba un team. Nan ta wak tur cos. Ela agrega cu despues di wega e unico cos cu un mayor mester bisa su yui ta: Mi a gusta wak bo hunga awe.  

 

Un participante a remarka cu na Aruba e proceso ta parse mas complica mirando cu nos hungadornan no por “showcase” nan mes personalmente dilanti coachnan di college, sin cu mester biaha bai Merca. Sinembargo Sr. Bartman a indica cu e temponan a cambia, y maske cu e componente di showcase / weganan ta uno importante, cu e tecnologia awendia, coachnan ta prefera wak e videonan via un link di youtube of twitter pa cuminsa wak e hungador. Su conseho pa ora di manda email ta cu mester inclui: informacion personal y academico (ki aña lo gradua, number di telefon, email, adres, GPA, nomber di mayornan) y informacion Atletico (peso, haltura, bateo, tiramento, position, estadistica, video y weganan). E prome paso ta pa concipia e email y considera por lo menos 30 school, 10 di cada preferencia (1st, 2nd, 3rd choice). Importante tambe ta e “fit” na un school, hasi bo sondeo di unda e college ta situa, e calidad di e programa academico, cuanto studiante ta atende, cuanto hungador tin den e position cu bo ta hunga, etc. Tene mas hopi contacto cu e coach posibel. 

 

Sr. Bartman a elabora tambe ariba e diferente nivel nan di universidad y college por ehempel NCAA (D1, D2, D3), NAIA (D1, D2, D3), NJCAA (D1, D2, D3). Ilustrando cu tin un “fit” pa cada hungador dependiendo ariba su nivel academico y atletico. Ademas ela menciona cu mas cu 80% di e MLB draft den 2022 a sali for di College. E oportunidad nan tey y lo sigui presenta pa hungadornan cu hasi nan esfuerzo pa studia, tene nan cifranan halto, sigui desaroya nan talento y character.

 

Si kier wak e grabacion completo di e sesion pa ricibi tur informacion por click ariba e link aki: bit.ly/3P2fvG0 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio