Search articles

Just in...

Court

Hoben sospecha di pasa den auto y tira riba dos hoben declara liber

Dec 9, 2022
How to Share With Just Friends

How to share with just friends.

Posted by Facebook on Friday, December 5, 2014

ORANJESTAD – Awe mainta e hoben N.d C.(18) a presenta dilanti Hues pa e caso penal cu Ministerio Publico a cuminsa contra dje. Fiscal ta acusa N.d C. cu riba 10 Mei 2020 a purba di mata dos hoben y tabata den posecion di un arma di candela.Solo di Pueblo por a compronde cu Fiscal no a haya legalmente proba cu N.d C. a tira y a pidi Hues pa declar’e liber. Fiscal a bisa N.d C., kende ta biba na Pos Chiquito, pa keda leu di gang pasobra esey lo bay hink’e den problema.INTENTO DI MATAHues a puntra N.d C. si el a tira. N.d C. a bisa Hues cu e no tin nada di haci cu e caso. Hues a mustra cu tabatin un caso di auto a pasa tira riba dos hoben homber H. y R. na Sabana Basora. Hues a bisa cu segun e relato di Polis, H. a bisa cu auto Nissan tabata pasa bay bin dilanti cas. Na dado momento un hende a saca man y tira riba dje y R. cu tabata para na e cas.SOSPECHOSO TA NENGASegun H. e persona ta N.d C. E sospechoso a bisa Hues cu e conoce H. bon y a bay school cun’e. El a desmenti categoricamente di a tira. N.d C. a bisa Hues cu e dia ey e tabata cu algun amigo den Pos Chiquito.Hues a mustra cu H. a reconoce N.d C. y a mustra R. un potret di N.d C. Hues a bisa cu Polis a mustra tanto H. como R. e potretnan. R. a bisa cu e no a mira esun cu a tira. Fiscal a confronta N.d C. cu e hecho cu dos di e amigonan cu el a bisa cu e tabata cun’e den Pos Chiquito, a bisa cu nan no tabata cu N.d C. Fiscal a remarca cu tin diferencia den declaracion di loke N.d C. ta bisa cu esnan cu tabata cun’e den bario.CONSEHO DI RECLASERINGHues a bisa cu Reclasering a haci investigacion y a constata cu N.d C. no a caba school. Hues a puntra N.d C. pakico e no ta bay school. El a splica cu nan a mata un amigo di dje, Sami, den su cura di cas na Pos Chiquito. N.d C. ta bisiña di e difunto. Esaki a keda traha riba dje y tambe el a bisa Hues cu na school constantemente e tabatin problema, pasobra nan ta haya cu e ta forma parti di e gang di Pos Chiquito, cual segun N.d C. no ta asina. Pesey, el a kita for di school y bay traha. El a bisa Hues cu door cu e ta biba na Pos Chiquito y ta anda cu esnan den bario, hopi hende ta kere cu e ta forma parti di e gang di Pos Chiquito pero e no tin nada di haci cu gang. El a bisa Hues cu tin otronan ta busk’e problema pero e ta evita. Reclasering ta haya cu N.d C. mester di guia pasobra e chens ta basta grandi cu e lo por bolbe cay den un delito.FISCALFiscal a bisa Hues cu investigacion haci relaciona cu tiramento, ta mustra cu tiramento tin di haci cu problema di gang. Constantemente tin tiramento por nada. Siman pasa 2 morto door di tiramento. Atrobe detencion cu a cay relaciona cu e ultimo asesinato, ta mustra cu ta asunto di gangnan. Awor nomber di N.d C. ta wordo menciona den e caso di tiramento na Sabana Basora. Fiscal ta mustra cu e chens tey cu N.d C. tambe lo por wordo tira aunke cu e ta bisa cu e no ta forma parti di gang. Fiscal ta convenci cu N.d C. lo ta forma parti di gang pero no tin prueba cu N.d C. a tira. Ta solamente H. ta bisa. Fiscal a pidi Hues pa declara N.d C. liber. El a bisa cu e ta spera cu N.d C. lo aleha di gang pa no bira un victima.ABOGADOAbogado mr. Kip a bisa Hues cu Fiscal a trece e punto di bista di defensa pa dilanti y a pidi pa declara N.d C. liber. E abogado a bisa cu N.d C. ta para riba cu e no tin nada di haci cu e tiramento. El a mustra cu tin diferencia di declaracion di e dos denunciantenan cu por cierto tin carchi di castigo. H. so ta bisa di a mira N.d C. y pa ley un testigo no ta suficiente. E abogado a bisa Hues cu ora Polis a bay cas unda N.d C. ta bisa pa investigacion, e mama a duna permiso pasobra e mama sa cu su yiu no a haci nada. El a mustra cu hopi biaha a pidi pa raport di Reclasering y te na ultimo a bin cu un raport caminda ta asumi cosnan. Cuestiona cu Reclasering ta mustra cu e chens ta grandi cu N.d C. lo haci delito pero no ta asina. E ta haya cu Reclasering ta pinta N.d C. malo siendo cu ta Ministerio Publico a keda sin kita un caso penal for di e carchi di castigo pasobra no tin caso. Abogado mr. Kip a bisa Hues cu caso di pasa tira for di auto (drive by shooting) ta hopi serio na Aruba. Den e caso aki di Sabana Basora, Fiscal ta haya cu no tin prueba y ta acusa N.d C. innecesario. El a pidi Hues pa declara N.d C. liber. Fiscal a hala N.d C. su atencion pa e keda leu for di gang pa evita cu e lo por bira un victima.SENTENCIAHues a sera tratamento di e caso y a dicta sentencia di biaha. Hues a bisa cu N.d C. a bisa cu pa di dos biaha, o sea pa di dos caso, cu ta acus’e falso di intento di mata. Na opinion di Hues, esaki ta debi na e hecho cu N.d C. ta anda cu cierto hendenan di gang di Pos Chiquito cu ta duna e impresion cu N.d C. ta forma parti di gang di Pos Chiquito. Hues ta haya cu N.d C. mester paga tino cu kende e ta anda. Hues a bisa cu e ta conoci cu Pos Chiquito y cu N.d C. ta bisiña di Sami cu a wordo tira mata na su cas. Hues a conclui cu mescos cu Fiscal y abogado, no tin prueba contra N.d C. y pesey ta declara N.d C. liber.

No items found.
No items found.