Search articles

Just in...

Court

Hopi hende boca habri: Homber deteni cu a sconde arma di candela den cel na warda di Polis condena na 21 luna di prison

Jan 21, 2023
How to Share With Just Friends

How to share with just friends.

Posted by Facebook on Friday, December 5, 2014

ORANJESTAD – Awe mainta e homber P.F.(21) a presenta dilanti Hues pa e caso penal cu Ministerio Publico a cuminsa contra dje.

  ARUBANATIVE por a compronde cu Polis a bin haya den e cel caminda a cera P.F. un revolver carga cu balanan scondi.

  E acusacion cu Fiscal a presenta den Corte contra P.F. ta, cu riba 7 Augustus 2022, e tabatin un arma di candela cun’e. E tabatin un revolver cu balanan. Notable ta cu agentenan di Polis a detene P.F. pasobra e tabatin un cuchiu cun’e. Despues ta resulta cu P.F. tabatin un revolver tambe pero Polis no a haya esaki. Ta despues a bin haya e arma scondi den e cel unda P.F. tabata cera.

REVOLVER HAYA DEN CEL

Hues a mustra cu P.F. a wordo deteni pasobra e tabatin un cuchiu cun’e. Na warda di Polis, despues cu P.F. a wordo cera den un cel, un preso den un otro cel a mira cu P.F. a sconde algo den cel. El a bisa Polis y investigacion a mustra cu den un meya a haya un revolver carga cu balanan.

  Segun P.F., e tabata den un situacion cu ora el a wordo deteni, e no sa si e bay entrega e arma, e agentenan lo bay saca nan arma contra dje.

HAYA ARMA BENTA ABAO

Segun P.F. el a bay un fiesta anochi y ora el a bay orina, den parkinglot el a haya e arma benta abou. Hues a remarca cu ta hopi straño con hende ta haya arma benta abao. El a bisa cu hopi biaha e ta scucha sospechoso bisa cu a haya e arma benta abao.

  Hues a mustra cu na Polis, P.F. a bisa cu el a mira e revolver benta abou y a coy esaki pa su mes. Hues a bisa P.F. cu e sa cu posecion di arma di candela ta prohibi. Hues a puntra P.F., sabiendo cu e ta prohibi pa ley, si e tabata vale la pena pa coy e arma benta abao y hiba cas. Segun P.F., e momento ey, e no a pensa esey. El a bisa cu esey ta su fout. El a bisa cu el a haya e arma bunita y pesey a coy esaki.

Hues a mustra cu P.F. a yega di haya castigo na 2019 pa menaza su padastro. P.F. a bisa Hues door cu e padastro a maltrata su mama, P.F. a sali na defensa di su mama. Ta asina cu actual, P.F. ta bibando serca su mama y no tin trabao.

FISCAL

Fiscal a bisa Hues cu e ta haya legalmente proba cu P.F. tabatin un revolver carga cu balanan. Polis a detene P.F. pero no a haya e arma ora a listra na dje. Fiscal a bisa cu e no ta kere e storia di P.F. cu el a haya e arma benta abao.

MESTER MANDA SEÑAL PA COMUNIDAD

Fiscal a bisa cu arma di candela na Aruba ta un problema serio. Tin varios caso di tiramento y hasta matamento. E ta haya cu mester manda un señal bon cla pa comunidad cu no ta tolera hende cana rond cu arma di candela.

EXIGI 21 LUNA DI PRISON

  Fiscal a bisa cu e ta sigui e maneho di Ministerio Publico y a exigi 21 luna di prison di cual 6 luna ta condicional cu un tempo di prueba di 3 aña. Fiscal a exigi tambe pa e arma di candela y balanan mester wordo destrui.

  Abogado mr. Illes a bisa Hues cu no tin mucho cos di bisa ya cu P.F. ta admiti y a haya e arma di candela. Pa loke ta e castigo, e abogado a pidi Hues pa mantene e castigo cu Corte sa duna cu ta 12 luna di prison.

HUES A BAHA CU MAN DURO

Hues a sera tratamento di e caso y a dicta sentencia di biaha. E ta haya legalmente proba cu P.F. tabatin un arma di candela y a sconde esaki den cel di warda di Polis.

NO KERE CU A HAYA ARMA BENTA ABAO

Hues a bisa cu e no ta kere cu P.F. a haya e arma benta abao. El a bisa cu mas biaha el a tende e storia aki den Corte.

Hues a bisa cu mester considera cu P.F. tabata cana arma cu un cuchiu y un arma di candela. Pa cu e castigo, Hues a bisa cu tin puntonan di orientacion y e no tin ningun motibo pa desvia di e exigencia di Fiscal.

CASTIGO

  Hues a bisa cu arma di candela ta un problema serio na Aruba y ta trece inseguridad den comunidad. Hues ta haya cu mester manda señal cu no ta tolera hende cana rond cu arma di candela. Hues a condena P.F. na 21 luna di prison di cual 6 luna ta condicional cu un tempo di prueba di 3 aña. Hues a duna orden pa destrui e arma di candela y balanan.    


No items found.
No items found.