Search articles

Just in...

Court

Hues ta haya cu Polis no a actua corecto: Homber declara liber di no a sigui ordo di Polis y resisti su detencion

Jan 16, 2023
How to Share With Just Friends

How to share with just friends.

Posted by Facebook on Friday, December 5, 2014

ORANJESTAD – E homber S.M.(22) a presenta den Corte di Husticia, pa e caso penal cu Ministerio Publico a cuminsa contra dje. E acusacionnan cu Fiscal a presenta den Corte contra S.M. ta, cu riba 4 November 2020 el a keda sin cumpli cu orden di Polis y a resisti ora di su detencion contra dos agente di Polis.

 ARUBANATIVE por a compronde cu S.M. a bisa Hues cu e agentenan di Polis ta gaña y con e por bay gana contra declaracion di tres agente di Polis. El a desmenti categoricamente di no a sigui orden di Polis y tampoco a risisti contra su detencion. Fiscal despues di tratamento di e caso a dicta sentencia di biaha y a declara S.M. liber.

RESISTI

Hues a bisa cu segun e relato di Polis, dia 4 November 2020 S.M. tabata cu dos otro persona bou di un mata sinta. Hues a puntra si nan tabata bebe alcohol. Segun S.M. nan tabata papia y no bebe alcohol. Na dado momento Polis a pasa y bay riba nan. S.M. a lanta para y puntra kico a pasa. Polis a bisa S.M. cu nan lo tabata bebiendo. S.M. a bisa cu nan no tabata bebe. Polis a bisa nan cu nan mester bay for di eynan. S.M. a bisa e 3 agentenan di Polis den e patruya, cu ey dilanti e ta biba. Polis a bisa cu e ta haya holor di marihuana. S.M. a bisa nan cu si ta asina nan mester investiga. S.M. a cuminsa hari. Segun S.M., un di e agentenan a bis’e pa stop di hari. Un di e agentenan a rank’e pa bent’e abao. E ora ey el a reclama kico ta pasando. E di dos tambe a bin tene y e di tres a saca un clop pa dal’e. E ora ey S.M. a zak abao pa stop. Segun S.M., un di e agentenan a pone su pia riba su cara. Segun S.M. ningun momento el a resisti contra su detencion. Hues a bisa cu e agentenan ta bisa cu S.M. a resisti. S.M. a bisa Hues cu tabatin hendenan eynan cu a mira kico a pasa y a reclama kico ta pasando. Un di nan a bay pa lanta pa bisa Polis pa stop y un agente a skop e.

  Fiscal a remarca cu e declaracion aki di S.M. ta diferente cu loke ta para den e relato di Polis. El a bisa S.M., pakico e no a bisa esey promer y pakico e no a haci keho. Segun S.M. na warda di Polis el a bisa cu e kier haci keho pero nan no a haci caso di dje. El a bisa Hues cu den e camber di interogacion, el a bisa e agentenan cu tabata interog’e cu un agente a trapa riba su cara. Fiscal a bisa cu segun e relato, Polis a bisa S.M. 3 biaha pa bay. S.M. a desmenti esaki. El a bisa Hues cu manera Polis a bis’e pa bay el a bay. Hues a bisa cu na Tomzitting, S.M. a haya multa di 400 florin. Segun S.M. el a paga mitar 200 y falta 200 mas. Hues a puntra pakico e no a sigui paga. El a bisa cu e por paga segun e tin placa.

FISCAL

Fiscal a bisa Hues cu e ta haya legalmente proba cu S.M. a resisti. E ta haya e multa di 400 florin na su lugar y si S.M. no paga, e lo mester bay 8 dia sera.

  S.M. a bisa Hues cu e ta haya cu e tres agentenan di Polis ta gaña y e no por gana nan.

SENTENCIA

Hues a sera tratamento di e caso y a dicta sentencia di biaha. Hues a bisa cu e ta pensa otro cu Fiscal. Hues ta haya cu e tres personanan tabata sinta bou di e mata y Polis a usa articulonan di ley cu no ta aplica pa e situacion aki. Hues a bisa cu e no ta haya cu S.M. culpable.

POLIS NO A ACTUA CORECTO

Hues a bisa cu e ta haya cu Polis no a actua corecto y no por a detene S.M. El a declara S.M. liber. Si Fiscal no apela, S.M. lo mester haya e 200 florin cu el a paga bek.

No items found.
No items found.