ORANJESTAD – Recien den Corte di Husticia, a trata un caso cu Ministerio Publico a cuminsa contra e homber Dominicano J.V.A. Ta asina cu Polis a hay’e cu un arma di candela cu bala riba lugar publico.
ARUBANATIVE por a compronde cu Fiscal a bisa cu e situacion na Aruba ta alarmante cu arma di candela. Fiscal a bisa cu Ministerio Publico a subi castigo. El a exigi 21 luna di prison. Hues a bisa cu arma di candela ta un problema serio na Aruba. El a confirma e castigo exigi pa Fiscal.
REVOLVER CU BALANAN
Fiscal a acusa J.V.A. cu riba 26 di Juni 2022 e tabatin un revolver cu balanan. Hues a puntra J.V.A. si e tabatin e arma. J.V.A. a bisa cu e anochi ey el a mira hende benta algo afor riba un parking lot y el a bay wak kico e ta. El a bisa cu tabata dos homber cu tabata papia y un di nan a saca algo for di su carson y pone abao. Pa su curiosidad el a bay mira y haya un revolver y a coy esaki. El a bisa Hues cu e mes no sa pakico el a coy e arma. Despues di un rato, Polis a par’e y a hay’e cu e arma. Hues a bisa cu J.V.A. a declara asina na Polis. El a bisa Polis cu esey ta un ganga pasobra e lo por a bende e revolve y gana placa. Segun J.V.A., e no kier a bay haci nada malo cu e arma. Hues a remarca cu bende arma di candela ta algo malo. El a bisa J.V.A. cu e sa kico ta pasa cu arma di candela. J.V.A. a bisa Hues cu el a siña su les.
FISCAL A BAHA PISA
Fiscal a bisa cu e ta haya legalmente proba cu J.V.A. tabatin un arma di candela y balanan cun’e. Na opinion di Fiscal, J.V.A. tabatin droga cun’e y a bay waki kico e homber a benta afor. A resulta cu ta un revolver.
Fiscal a bisa Hues cu e no ta kere e storia di J.V.A. Fiscal a bisa cu arma di candela ta un problema serio na Aruba. Tabatin casonan di asesinato cu arma. El a sigui bisa cu J.V.A. tabata riba lugar publico den sector turistico cu e arma. El a bisa cu Ministerio Publico ta baha cu man duro riba esnan cu tin arma di candela. El a exigi 21 luna di prison di cual 6 luna ta condicional cu 2 aña di prueba. Fiscal a exigi pa e revolver cu balanan y droga cu J.V.A. tabatin ta wordo destrui.
SENTENCIA
Hues a sera tratamento di e caso y a dicta sentencia di biaha. Hues ta haya legalmente proba cu J.V.A. tabatin un arma di candela cu balanan. Hues a bisa cu e no ta kere e storia cu J.V.A. a haya e arma abao. Hues a bisa cu no ta promer biaha cu e ta scucha tipo di declaracion asina den Corte. El a mustra cu J.V.A. tabatin arma na caminda publico. Hues a pone enfasis riba e asunto cu arma di candela ta un problema serio na Aruba. El a bisa cu Corte ta baha pisa contra esnan cu ta cana cu arma.
Hues a confirma e exigencia di Fiscal. El a condena J.V.A. na 21 luna di prison di cual 6 luna ta condicional y 3 aña di prueba. Hues a duna orden pa e arma y droga keda destrui.
