Willemstad, Corsou:
Dialuna anochi Kustwacht a señala un boto sospechoso acercando e costa di Corsou. E Centro di Operacion Maritimo (MOC) di Kustwacht despues di a detecta e boto aki, mesora a manda e Cutter Jaguar y un Metal Shark na e localidad unda e boto sospechoso a wordo detecta.
Una bes cu e botonan di kustwacht a yega den e area aki, nan a bin topa cu un boto chikito cu un cantidad grandi di persona abordo. E boto mesora a wordo intercepta, riba e boto tabata tin 31 persona tur indocumenta. E boto a wordo mesora confisca y tur 31 persona y e boto a wordo hiba na e pier di Kustwacht. Despues e 31 indocumentanan a wordo entrega den man di Kuerpo Polisial di Korsou, cu lo sigui haci mas investigacion relaciona cu e caso grandi aki di contrabando di persona.
Kustwacht den cooperacion cu Kuerpo Polisial di Korsou lo intensiva mas ainda e controlnan riba lama, especialmente pa e periodo nos dilanti.
E controlnan intensivo aki ta pa cuida e fronteranan di Corsou contra traficacion di droga, contrabando di hende y arma. Pa Kustwacht por haci e controlnan di e awanan teritorial y e costanan optimalmente, nan ta haci un peticion na e pueblo di Corsou pa yudanan den esaki, simpelmente pa ta un civil alerto, cu si mira cualke situacion sospechoso riba lama of na Costa, pa yama Kustwacht mesora via e number 913 of via whatsapp 510 0913.
