“San Nicolas, Center of Public Service John Wesley” ta e vision pa MFA San Nicolas
Vision di Gabinete Mike Eman I y II tabata di mira ehecucion di construccion di e diferente MFA nan rond nos isla. E meta tabata di construi den tur districto un MFA, tanto na Noord, Paradera, Sta. Cruz, Savaneta y San Nicolas.
MFA San Nicolas tabata den fase di diseño/pintamento pero debi na cambio di gobernacion, lamentablemente no a continua cu e planificacion di MFA San Nicolas, ta locual cu Minister Presiden Mike Eman a comparti durante su discurso dialuna.
Mientrastanto ocho aña a pasa y no por a realisa e MFA San Nicolas. Na momento cu Gabinete AVP-Futuro a sinta, a saca e dosier bek y cuminsa cana e caminda pa por yega na e realisacion di MFA San Nicolas.
PMEC, e arkitectonan engarga, DOW como tambe esnan cu a guia e proyectonan anterior di MFA, cu hopi conocemento di e materia tambe presente, pa asina percura pa mas pronto posibel e destaho publico por sali, escogencia por tuma luga y asina construccion por tuma luga, probablemente na inicio di otro aña.
Premier Eman a indica cu ta sumamente contento cu adaptacionnan haci te na e momento aki, pintura/diseño ta den fase final, a duna algun observacion y cambio teknico riba locual tabatin anteriormente na 2017. Avanse den teknologia ta duna opcion pa baha gasto.
San Nicolas ta en espera di su MFA, ta locual Minister President a indica.
Presencia di full e team na edificio asigna pa e proyecto di MFA ta pa asina haya un bon bista di locual cu tin al rededor, caminda por observa algun edificio monumental historico den un concepto mas integral, kico lo por haci cu nan na San Nicolas.
St. Maartenstraat cu ta un caya principal historicamente, tambe tin e ‘Civicspine’ cual ta caya Dick Cooper tambe ta esencial, tambe cuminsando for di Nicolas Store te cu Watertoren caminda comunidad ta bin hunto, e area di parkeo, cas historico di famia Vorst, cual ta partinan cu por integra den un compleho completo cu por inclui diferente servicio di gobierno.
Logicamente e MFA San Nicolas lo brinda servicio manera tur otro MFA / hulpbestuurskantoor na unda por paga entre otro impuesto, awa, luz como tambe servicio di AZV, Setar y algun departamento adicional manera di labor den cual caminda por haya accesoria riba derecho laboral, cual ultimo ta riba peticion di Minister Cicilia.
E intencion ta pa duna MFA San Nicolas e centro cu semper tabata e intencion pa nan tin, incluyendo areanan cu por huur oficina cu club, empresa cu salanan di reunion y/of exposicion disponibel.
Premier Eman a expresa di bay scucha di e comunidad tambe nan deseo di kico lo ta locual nan kier mira como servicio den MFA San Nicolas.
Lo sondia posibilidad di adkisicion di un edificio dilanti e proyecto aki, e ta riba lista di interes di gobierno y asina mira si por logra conecta e edificionan aki y amplia e proyecto.
E vision ta di mira pronto e proyecto grandi aki, incorpora den un centro di servicio gubernamental den henter e area y asina mira den futuro riba e edificio: “ San Nicolas, Center of Public Service John Wesley”
