Ultimamente a tuma luga e entrega oficial di Zoutmanstraat 1. Prome Minister mr. Mike Eman conhuntamente cu Minister di Salubridad, Asuntonan Social, Cuido di Adulto Mayor y Maneho di Adiccion Mervin Wyatt-Ras a ricibi e edificio historico aki completamente restaura.
Premier Eman a indica cu e ta bunita di mira cu Directie Ouderenzaken ta esnan cu lo ocupa e edificio, como cu ta un parti importante di historia di nos isla. Fort Zoutman tabata un di e prome oficinanan administrativo di nos isla den pasado y tabata fungi como oficina di Douane, Polis, registracion, te hasta Corte y Parlamento, despues segun desaroyo y modernisacion a construi e edificio di Zoutmanstraat 1 y a muda gran mayoria di oficinanan administrativo pa e localidad aki.
Awer ta toca turno na Directie Ouderenzaken pa ocupa e edificio historico aki. Esaki ta mustra tambe e balor cu ta duna na e departamento di asuntonan di adultonan mayor. Monumentenbureau a sa di guia e proceso te na e momento final di su entrega. Prome Minister Eman a expresa palabra di admiracion na tur cu a forma parti di e proyecto aki, muy particular e supervision pa percura pa e edificio keda den su forma autentico.
